Амбасада Балгарыі ў Мінску прыпыніць выдачу нацыянальных і шэнгенскіх віз

31 ліпеня, Позірк. Консульскі аддзел пасольства Балгарыі ў Мінску па тэхнічных прычынах “часова прыпыняе працу з грамадзянамі”, паведамляе прэс-служба дыпмісіі.

З 1 па 16 жніўня нельга будзе здаць дакументы на атрыманне адзіных шэнгенскіх віз тыпу “С”, а з 9 па 16 жніўня — нацыянальных віз тыпу “D”.

Акрамя гэтага, з 9 па 16 жніўня будзе прыпынены прыём дакументаў на выдачу балгарскіх асабістых дакументаў, пададзеных балгарскімі грамадзянамі, якія пражываюць за мяжой, а таксама — на запэўненне і легалізацыю для балгарскіх і замежных грамадзян.

У пасольстве падкрэслілі, што выключэнні будуць зроблены толькі ў экстраных і гуманітарных выпадках па заявах і выдачы часовых пашпартоў і запэўненні даверанасцей і дэкларацый.

Раней паведамлялася, што з 15 красавіка візавы цэнтр VFS Global у Мінску пачаў прымаць дакументы, а з 1 траўня — у іншых візавых цэнтрах кампаніі на тэрыторыі Беларусі.

У сувязі з рашэннем Савета Еўрасаюза аб адмене з 31 сакавіка пагранічнага кантролю ў межах Шэнгенскай зоны для Румыніі і Балгарыі на марскіх і паветраных межах балгарскія консульскія службы з 1 красавіка выдаюць “адзіныя” шэнгенскія візы (са зборам біяметрычных даных) грамадзянам трэціх краін.