Пракуратура пасля гібелі дзіцяці ў лагеры падчас непагадзі выявіла парушэнні ва ўсіх установах Гомельскай вобласці

5 жніўня, Позірк. У аздараўленчым лагеры ў Рэчыцкім раёне Гомельскай вобласці, дзе 14 ліпеня загінула дзіця падчас урагану, было “фармальнае стаўленне адміністрацыі <…> да правядзення інструктажоў, трэніровак па эвакуацыі і дзеяннях у надзвычайных сітуацыях”, паведаміла па выніках праверкі дзіцячых аздараўленчых устаноў Гомельскай вобласці прэс-служба Генеральнай пракуратуры.

Адзначаецца, што “падчас урагану ў выніку адсутнасці арганізаванай эвакуацыі дзяцей чацвёра непаўналетніх атрымалі цялесныя пашкоджанні, а адзін чатырнаццацігадовы хлопчык памёр на месцы здарэння ад атрыманых траўм”.

Згодна з вывучанымі відэазапісамі, загінулае дзіця накіравалася ў спальны корпус не да бліжэйшага галоўнага ўваходу, а да запаснога, з тыльнага боку будынка, дзе на лесвіцы было смяротна траўміравана.

У цэлым дзіцячыя аздараўленчыя лагеры рэгіёну “не ў поўнай меры” адпавядаюць патрабаванням бяспекі і палажэнням дзеючага заканадаўства, гаворыцца ў рэлізе.

У лагерах “адсутнічаў належны кантроль за дзецьмі, з прычыны чаго адбываліся сістэматычныя парушэнні дысцыпліны і ўнутранага распарадку, паміж дзецьмі адбываліся канфлікты, якія заканчваліся атрыманнем імі цялесных пашкоджанняў”, адзначае ведамства.

Ва ўсіх абследаваных лагерах не выконваліся санітарна-гігіенічныя патрабаванні. Напрыклад, у адным з аздараўленчых лагераў не выконваліся ўмовы захоўвання прадуктаў харчавання, што прыводзіла да іх хуткага псавання.

Акрамя таго, устаноўлены парушэнні і ў арганізацыі харчавання дзяцей.

У адным са спартыўных лагераў згодна з дакументамі было залічана 87 дзяцей, “аднак належны ўлік знаходжання ў лагеры выхаванцаў не быў наладжаны”. На момант наведвання лагера пракурорскімі работнікамі амаль палова дзяцей адсутнічала. Пры гэтым двое хлопчыкаў, якія пражываюць у Мінскім раёне і афіцыйна не залічаныя ў лагер, штодня яго наведвалі.

Фактычна там кармілі толькі 48 дзяцей, хаця “штодзённае трохразовае харчаванне за кошт мэтавых бюджэтных сродкаў аплачвалася згодна з колькасцю непаўналетніх залічаных у лагер”.

Па гэтым факце пракуратура Жытовіцкага раёна накіравала ў раённы аддзел унутраных спраў даручэнне аб правядзенні праверкі для дачы крымінальна-прававой ацэнкі.

Па выніках маніторынгу пракуратура вобласці ўнесла ў Гомельскі абласны выканаўчы камітэт прадстаўленне аб устараненні выяўленых парушэнняў. Выкананне акта пракурорскага нагляду ўзята на кантроль.

Паводле звестак МНС, ад непагадзі ў ліпені ў Беларусі загінула сем чалавек, у тым ліку двое дзяцей.