6 жніўня, Позірк. Дзевяць літоўскіх памежнікаў, у тым ліку кінолагаў і спецыялістаў па крымінальнай выведцы, адправіліся 5 жніўня ў Латвію, каб дапамагчы ёй ахоўваць мяжу з Беларуссю, піша LSM.
Літоўская група прабудзе на латвійска-беларускай мяжы не менш як два тыдні.
Раней паведамлялася, што Рыга прасіла Вільнюс накіраваць да 15 памежнікаў.
LSM нагадвае, што ўвосень 2023 года Літва накіроўвала ў Латвію 20 памежнікаў для дапамогі з аховай мяжы з Беларуссю, прадухіленнем нелегальнай міграцыі, іншымі аперацыямі.
У ліпені 2024 года Латвія прадухіліла 1.043 спробы нелегальнага перасячэння мяжы з боку Беларусі — у 1,2 раза больш, чым у ліпені 2023-га (899), і ў 2,4 раза больш, чым у сёлетнім чэрвені (427). Рэзкі рост у параўнанні з мінулым месяцам можа быць патлумачаны сярод іншага тым, што ў чэрвені ў Польшчы пачала дзейнічаць буферная зона на мяжы з Беларуссю. Плынь мігрантаў, якія імкнуцца нелегальна перасекчы беларуска-польскую мяжу, істотна зменшылася, але вырасла на іншых участках знешніх рубяжоў Еўрасаюза, у прыватнасці на латвійскім.
Ад пачатку года суседнія краіны ЕС папярэдзілі не менш за 25.966 спробаў пранікнення нелегалаў з беларускай тэрыторыі (за той жа перыяд 2023 года — 25.040). Па-ранейшаму пераважная большасць прыпадае на Польшчу — не менш за 21.895 спробаў (18.187), далей ідуць Латвія — 3.698 (5.356) і Літва — 373 (1.497).
З вясны 2021 года на мяжы Беларусі і Еўрасаюза цягнецца міграцыйны крызіс, які ўлады Польшчы і краін Балтыі называюць “гібрыднай атакай”, арганізаванай рэжымамі ў Мінску і Маскве.
