У сувязі з новымі санкцыямі Ціханоўская заклікала ЕС працягваць ціск на рэжым

5 жніўня, Позірк. Працягваць ціск на рэжым Аляксандра Лукашэнкі і ягоных памагатых “мэтанакіраванымі дзеяннямі” заклікала дэмакратычны лідар Святлана Ціханоўская, каментуючы ўвядзенне 5 жніўня Еўрасаюзам санкцый у дачыненні да 28 прадстаўнікоў Мінска.

Дэмлідэр падзякавала ЕС і адзначыла неабходнасць далейшай падтрымкі народа Беларусі, які выступае супраць дыктатуры і агрэсіі Расіі супраць Украіны.

5 жніўня Савет ЕС паведаміў пра ўключэнне ў санкцыйны спіс прадстаўнікоў рэжыму, 13 з якіх — суддзі, датычныя да вынясення палітычна матываваных прыгавораў. У спіс таксама трапіла кіраўніцтва ГУБАЗіК МУС і некалькіх месцаў пазбаўлення волі, дзяржабвінаваўцы на палітычных судах, прапагандысты.

Такім чынам, пад санкцыямі ЕС цяпер 261 чалавек і 37 кампаній. Іх актывы на тэрыторыі Еўрасаюза ў выпадку выяўлення падлягаюць замарозцы. У дачыненні да фізічных асоб дадаткова ўведзена забарона на паездкі, што не дазваляе ім уязджаць на тэрыторыю ЕС або рухацца транзітам праз яе.

Новыя санкцыі, як адзначаецца ў прэс-рэлізе, прынятыя напярэдадні чацвёртай гадавіны “сфальсіфікаваных прэзідэнцкіх выбараў у жніўні 2020 года”.

У дачыненні да Беларусі (яе грамадзян і кампаній) санкцыі былі ўведзеныя дэмакратычнымі краінамі за фальсіфікацыю прэзідэнцкіх выбараў 2020 года, рэпрэсіі, прымус да пасадкі ў Мінску самалёта ірландскай авіякампаніі Ryanair, падтрымку ваеннай агрэсіі Расіі супраць Украіны.