Літоўская кампанія аштрафавана на 13 млн еўра за экспарт аўтамабіляў у Беларусь і іншыя краіны ў абыход санкцый

7 жніўня, Позірк. Зарэгістраваная ў Літве кампанія, якая экспартуе аўтамабілі, была аштрафаваная за абыход санкцый Еўразвяза на 13,6 млн еўра, у яе таксама былі канфіскаваныя шэсць паўпрычэпаў. Аб гэтым паведаміла Мытная служба Літвы.

Кампанія, як паведамляецца, “не забяспечыла захаванне абмежаванняў і абавязацельстваў, накладзеных міжнароднымі санкцыямі, якія прымяняюцца ў Літоўскай Рэспубліцы” пры заключэнні здзелак з кампаніямі, зарэгістраванымі ў Казахстане, Беларусі і Турцыі. Таму “перавозка затрыманых транспартных сродкаў была расцэнена як парушэнне міжнародных санкцый”.

Гэта не першы выпадак, калі кампаніі падвяргаюцца такой меры за парушэнне закона аб міжнародных санкцыях, пасля ўвядзення ўзмоцненых мер праверкі з боку літоўскай мытні, паведамілі ў ведамстве.

Польская тэлекампанія TVP са спасылкай на даныя Нацыянальнай падатковай адміністрацыі (ННА) паведамляла ў ліпені, што з пачатку года мытнымі і падатковымі органамі гэтай краіны была ўзбуджана 51 справа супраць кампаній, якія не выконваюць еўрапейскія і нацыянальныя санкцыі ў гандлі з Беларуссю і Расіяй. За абыход санкцый, у прыватнасці, продаж у РФ аўтамабіляў прэміум-класа спагнання накладзены на шэсць польскіх кампаній.

29 чэрвеня Еўрапейскі саюз прыняў новы пакет санкцый у дачыненні да Беларусі. Спіс тавараў, забароненых у адпаведнасці з ім да паставак з ЕС у Беларусь, змяшчае некалькі соцень пазіцый.

У канцы сакавіка Польшча, Латвія і Літва перасталі пускаць у Беларусь аўтамабілі на транзітных нумарах з аб’ёмам рухавіка больш за 1,9 літра коштам звыш 50 тыс. еўра.

Літоўская мытня пазней узмацніла кантроль за экспартам электрамабіляў, бо амаль кожны другі аўтамабіль, экспартаваны ў трэція краіны (Беларусь, Казахстан, Узбекістан і інш.) коштам ад 50 тыс. еўра, пазней аказваўся на расійскім рынку.