Ціханоўская спадзяецца на будучае членства Беларусі ў Супольнасці дэмакратый

8 жніўня, Позірк. “З нецярпеннем чакаю пачатку працы з Супольнасцю дэмакратый і спадзяюся ўбачыць дэмакратычную Беларусь у якасці яе члена ў будучыні”, — адзначыла кіраўніца Аб’яднанага пераходнага кабінета Святлана Ціханоўская, віншуючы Мантаса Адаменаса з прызначэннем на пасаду генеральнага сакратара арганізацыі.

“Дарагі Мантас, вы сапраўдны сябар Беларусі і адданы змагар за свабоду”, — напісала палітык на сваёй старонцы ў сацыяльнай сетцы Х.

Мантас Адаменас — экс-дэпутат літоўскага Сейма (2008–2020), былы намеснік міністра замежных спраў Літвы (2020–2023). Пачне выконваць абавязкі генсакратара вышэйзгаданай арганізацыі 1 верасня 2024 года.

Супольнасць дэмакратый — створаная ў 2000 годзе глабальная міжурадавая кааліцыя са штаб-кватэрай у Варшаве. Займаецца “ўмацаваннем прыхільнасці прынцыпам Варшаўскай дэкларацыі”, “пашырэннем дыялогу па праблемах і магчымасцях прасоўвання і ўмацавання дэмакратычных працэсаў і інстытутаў”.