Lawtrend: З 2020 года ў Беларусі ліквідавана не менш за 1.742 НКА

6 жніўня, Позірк. За перыяд пасля прэзідэнцкіх выбараў 2020 года і да канца ліпеня 2024-га ў Беларусі ліквідавана не менш за 1.742 некамерцыйныя арганізацыі (НКА) — аб’яднанні, прафсаюзы, фонды, недзяржаўныя ўстановы і асацыяцыі, гаворыцца ў аглядзе праваабарончай арганізацыі Lawtrend.

На канец чэрвеня было ліквідавана не менш за 1.696 НКА, траўня — 1.665, красавіка — 1.622, сакавіка — 1.601, лютага — 1.563, студзеня — 1.533, снежня 2023-га — 1.509. На канец снежня 2022 года налічвалася 1.173 закрытыя некамерцыйныя арганізацыі.

Паводле інфармацыі праваабаронцаў, на канец ліпеня не менш за 1.086 НКА знаходзілася ў працэсе прымусовай ліквідацыі (1.061 — у канцы чэрвеня, 1.033 — траўня, 1.003 — красавіка, 997 — сакавіка, 981 — лютага, 969 — студзеня, 960 — снежня 2023-га) з улікам пададзеных у суд іскаў, прымусовага выключэння з Адзінага дзяржрэгістра юрыдычных асоб і індывідуальных прадпрымальнікаў.

Колькасць арганізацый, якія прынялі рашэнне аб самастойнай ліквідацыі, павялічылася. На канец ліпеня такіх было 656, чэрвеня — 635, траўня — 632, красавіка — 619, сакавіка — 604, лютага — 582, снежня 2023-га — 564, снежня 2022-га — 416.

Адзначаецца, што рашэнне аб самаліквідацыі па-ранейшаму прымаецца ў асноўным з-за ціску на сяброў НКА, неспрыяльнага прававога асяроддзя і грамадска-палітычнай сітуацыі.

Lawtrend падкрэслівае, што ліквідуюцца найперш рэспубліканскія грамадскія аб’яднанні, якія не выканалі новыя патрабаванні заканадаўства для аб’яднанняў рэспубліканскага статусу. Маецца на ўвазе неабходнасць наяўнасці арганізацыйных структур ва ўсіх абласцях Беларусі і Мінску. Грамадскія аб’яднанні, статуты якіх не прадугледжвалі такой структуры, павінны былі ўнесці змены ў іх да 4 сакавіка бягучага года.

“У сувязі з гэтым у бліжэйшыя месяцы кампанія па ліквідацыі грамадскіх аб’яднанняў можа мець вельмі інтэнсіўны характар”, — адзначае Lawtrend.

Праваабаронцы падкрэсліваюць, што ў сувязі з увядзеннем новага віду ліцэнзуемай дзейнасці — сацыяльныя паслугі ў форме стацыянарнага сацыяльнага абслугоўвання — ліцэнзія спатрэбіцца недзяржаўным арганізацыям, у тым ліку НКА, якія надаюць такія паслугі.

Усяго ліцэнзаванню падлягаюць каля 40 сфер і відаў дзейнасці, але многія іншыя сферы і віды дзейнасці патрабуюць акрэдытацыі, сертыфікацыі, уключэння ў спецыяльны рэестр і г.д. Колькасць гэтых відаў абмежаванай дзейнасці расце, распаўсюджваючыся на ўсе новыя сферы, у тым ліку традыцыйныя для НКА, зазначаюць праваабаронцы.