Дзяржпагранкамітэт абвінавачвае літоўскіх калег у павольнай рабоце ў пункце пропуску Мядзінінкай
20 лютага, Позірк. Дзяржаўны памежны камітэт (ДПК) абвінавачвае літоўскіх калег у павольнай працы ў пункце пропуску Мядзінінкай (Каменны Лог).
Паводле звестак прэс-службы ведамства, за суткі кантрольныя службы Мядзінінкая аформілі 17% аўто ад прапускной здольнасці, гэта значыць тры фуры за гадзіну з 20 магчымых. Супрацоўнікі астатніх літоўскіх пагранпераходаў аформілі 43% велікагрузаў. У польскім пункце пропуску Кукурыкі (Казловічы) сумежны бок выканаў норму на 70%, у латвійскім Патэрніекі (Грыгараўшчына) — на 48% фур, удакладнілі ў ДПК.
Літоўскі напрамак застаецца самым загружаным на шляху ў ЕС — тут афармлення чакаюць каля 450 грузавікоў.
Па стане на 10 гадзін 20 лютага найбольшая чарга легкавога транспарту фіксуецца перад польскім пагранпераходам Цярэспаль (Брэст). Яго супрацоўнікі за суткі прапусцілі на сваю тэрыторыю 44 працэнты аўто ад нормы. Аўтамабілі таксама чакаюць уезду ў ЕС перад літоўскімі пунктамі пропуску Катлоўка (Лаварышкес), Шальчынінкай (Беняконі) і Райгардас (Прывалка).
Камісія па нацыянальнай бяспецы (КНБ) Літвы 6 лютага прапанавала спыніць рух тавараў, транспарту і людзей праз памежныя пункты пропуску Лаварышкес і Райгардас на мяжы з Беларуссю. Рашэнне павінна прыняць урад.
Летась у жніўні Літва закрыла два з шасці пунктаў пропуску — Шумскас і Твярячус.
КНБ таксама прапанавала паступова скараціць колькасць дазволаў, якія выдаюцца беларускім і літоўскім перавозчыкам, якія ажыццяўляюць рэгулярныя міжнародныя пасажырскія перавозкі аўтобусамі, а таксама абмежаваць пасадку і высадку пасажыраў на чыгуначным памежным пункце пропуску Кяна.
