Толькі чвэрць школ пакуль атрымала пашпарты гатоўнасці да новага навучальнага года — урад
15 жніўня, Позірк. Аб гатоўнасці да новага навучальнага года чвэрці школ паведаміў віцэ-прэм’ер Ігар Петрышэнка па выніках тэматычнай нарады 15 жніўня. Відэафрагменты каментароў чыноўніка апублікавала прэс-служба Саўміна.
Паводле яго слоў, на гэты момант адпаведныя пашпарты з 2,6 тыс. школ краіны атрымалі 652 (25,1%).
У новым навучальным годзе будуць працаваць 3,7 тыс. дашкольных устаноў, у якіх будуць займацца каля 355 тыс. дзяцей. У школу пойдуць 1,07 млн навучэнцаў, з іх 105 тыс. — першакласнікі.
Да 1 верасня плануецца здаць у эксплуатацыю тры дзіцячыя садкі і чатыры школы, сказаў Петрышэнка.
“Мы ўдасканалілі нарматыўную прававую базу з пункту гледжання падрыхтоўчых этапаў і неабходнасці маніторынгу адпаведнымі камісіямі, — адзначыў віцэ-прэм’ер. — На сённяшні дзень ліквідавана каля 95% выяўленых недахопаў. Да 20 жніўня ўсе мусяць атрымаць пашпарты”.
З 1 верасня астатнія 506 школ пяройдуць на арганізацыю харчавання па новых нормах, удакладніў ён.
Як адзначыла на нарадзе міністр працы і сацыяльнай абароны Наталля Паўлючэнка, 80% шматдзетных сем’яў ужо атрымалі дапамогу на падрыхтоўку дзяцей-школьнікаў да навучальнага года, паведамляе прэс-служба ведамства.
“Ва ўсіх рэгіёнах рэспублікі аднаразовую матэрыяльную дапамогу на падрыхтоўку дзяцей да школы атрымалі больш за 93,5 тыс. шматдзетных сем’яў. Агульная сума выплат склала 24,5 млн рублёў”, — адзначыла чыноўніца.
Аднаразовая матэрыяльная дапамога прадастаўляецца незалежна ад даходу сям’і. Памер дапамогі — 129,9 рубля на кожнага школьніка ў сям’і.
Падтрымка сем’ям з дзецьмі-школьнікамі таксама аказваецца праз прадастаўленне дзяржаўнай адраснай сацдапамогі (ужо атрымана 3,3 млн рублёў на 4 тыс. дзяцей), дабрачыннай дапамогі (212,1 тыс. рублёў на 8,9 тыс. дзяцей), дапамогі па месцы працы. бацькоў (больш за 2,5 млн рублёў на 22,3 тыс. дзяцей).
1 жніўня стала вядома, што канцэрн “Беллегпрам” хоча “кансалідаваць нацыю” праз “патрыятычныя” шаўроны для школьнай формы. На думку старшыні канцэрна Таццяны Лугінай выкарыстанне ў школьнай форме шэўронаў з дзяржсімваламі прывівае дзецям “любоў да дзяржаўнай сімволікі” і з’яўляецца “свайго роду кансалідацыяй” нацыі.
Пазней намеснік міністра адукацыі Аляксандр Кадлубай заявіў, што размова ідзе аб эксперыменце, які будзе праведзены ў 20 сталічных школах, па ўкараненні аднаго камплекта школьнай формы для дзяўчынак і хлопчыкаў розных узростаў, каляровай гамы з устаноўленым шэўронам.
Дэпутаты Палаты прадстаўнікоў і члены Савета Рэспублікі праводзяць маніторынг гандлёвых аб’ектаў і вывучаюць цэны на школьную форму.
Пасля 2020 года ўлады ўзяліся за ідэалагічную працу ў школах, якая тычыцца не толькі падручнікаў, але і знешняга выгляду дзяцей, а таксама мерапрыемстваў, якія адбываюцца ў школах. У маі гэтага года камітэт па адукацыі Мінгарвыканкама рэгламентаваў “фармат і парадак” правядзення выпускных вечароў у сталічных школах, не рэкамендавалася прыцягваць артыстаў і дыджэяў, таму што яны “не ведаюць ні традыцый школы, ні рабят, ні педагогаў”, не змогуць “стварыць душэўную, цёплую атмасферу”.