18 жніўня, Позірк. Тры чалавекі шпіталізаваныя ў выніку аварыі з удзелам міжнароднага аўтобуса Масква — Брэст. ДТЗ адбылося каля 6 гадзін раніцы 18 жніўня ў Дзяржынскім раёне Мінскай вобласці на аўтадарозе М1 Брэст — Мінск — мяжа РФ, паведамляе прэс-служба МУС.
Паводле папярэдняй інфармацыі, кіроўца 1973 года нараджэння не даў рады кіраванню, з’ехаў у правы па ходзе руху кювет і ўрэзаўся ў прыдарожныя дрэвы.
У салоне знаходзіліся два кіроўцы і 46 пасажыраў.
Абнаўленне. Паводле інфармацыі Міністэрства аховы здароўя, у ДТЗ пацярпела 9 чалавек. Трое шпіталізаваных знаходзяцца ў Дзяржынскай цэнтральнай раённай бальніцы, адзін з іх у стане сярэдняй цяжкасці змешчаны ў аддзяленне анестэзіялогіі і рэанімацыі. Для надання дапамогі спецыялістам бальніцы на кансіліум выязджаў траўматолаг “абласнога ўзроўню”. Чацвёра пацярпелых “агледжаныя спецыялістамі і накіраваныя на амбулаторнае лячэнне”. “Яшчэ дзве пацярпелыя, якія з’ехалі ў Баранавічы, былі агледжаныя спецыялістамі-траўматолагамі Баранавічаў і таксама накіраваныя на амбулаторнае лячэнне”, — адзначае міністэрства.
Яшчэ ў адным рэлізе ад 18 жніўня ведамства паведамляе пра пяць пацярпелых у ДТЗ у Мсціслаўскім раёне Магілёўскай вобласці. Сярод іх дзеці 11 і 13 гадоў, стан абодвух ацэньваецца як здавальняючы, яны шпіталізаваныя ў хірургічнае аддзяленне цэнтральнай раённай бальніцы для “дынамічнага назірання”. Адзін дарослы ў “цяжкім стабільным” стане быў змешчаны ў аддзяленне рэанімацыі і анестэзіялогіі, да яго адправілі рэанімабіль для транспарціроўкі ў Магілёўскую бальніцу хуткай медыцынскай дапамогі. Яшчэ двое дарослых шпіталізаваныя ў хірургічнае аддзяленне райбальніцы з “ударамі і сінякамі рознай ступені цяжкасці”.
