Муж палітзняволенай Шарэнды-Панасюк паведаміў пра рэзкае пагаршэнне яе здароўя
4 верасня, Позірк. Пра рэзкае пагаршэнне стану палітзняволенай Паліны Шарэнда-Панасюк паведаміў яе муж Андрэй Шарэнда.
На фоне новага ўказу Аляксандра Лукашэнкі аб памілаванні групы асуджаных па палітычных матывах Шарэнда напісаў, што яго жонка “памірае ў турме”.
“Яна пакутуе ад рэзкіх боляў збоку жывата, якія аддаюць у спіне. Патрэбную медыцынскую дапамогу Паліне не аказваюць, даюць толькі абязбольваючыя”, — паведаміў Шарэнда.
Паводле яго слоў, вядома толькі, што ў яе хранічны панкрэатыт, “вельмі цяжкая хвароба, якая патрабуе строгай дыеты і сталага кантролю лекараў”. Ва ўмовах, у якіх утрымліваецца палітзняволеная, “гэта проста адтэрмінаваны смяротны прысуд”.
Таксама Шарэнда паведаміў, што жонку перавялі з гомельскага СІЗА №3 у рэчыцкі ізалятар часовага ўтрымання (ІЧУ) для правядзення “следчых дзеянняў”.
Паводле яго слоў, умовы ў ІЧУ Рэчыцы “нават горшыя за камеры ў ШІЗА (штрафны ізалятар. — “Позірк”.) ў калоніі”: “Там не выдаюць матрацаў, у камерах адсутнічаюць прыбіральні, і вельмі шмат блашчыц. Спаць даводзіцца на падлозе. У мінулым годзе Паліну таксама трымалі там некалькі тыдняў. Пратэстуючы супраць жудасных умоў утрымання, Паліна тады аб’яўляла галадоўку. Лукашысты былі вымушаныя пайсці на саступкі і вярнулі Паліну ў Гомельскі СІЗА №3 да суда. Этап у рэчыцкі ІЧУ не мае ніякага сэнсу, акрамя таго, як зняважыць і знясіліць Паліну, падарваць яе і да таго слабое здароўе <… >. Паліну трэба ратаваць! Яе жыццё сапраўды ў небяспецы”.
Пра тое, што Шарэнда-Панасюк знаходзіцца ў гомельскім следчым ізалятары № 3, стала вядома 17 ліпеня.
22 сакавіка ў эфір выйшла інтэрв’ю Шарэнда-Панасюк дзяржаўнаму тэлеканалу “Беларусь 1”. Яна паведаміла, што звярнулася да Лукашэнкі з прашэннем аб памілаванні.
Праваабаронцы паведамлялі, што яна можа выйсці на волю 21 траўня, аднак пасля стала вядома, што ў дачыненні да яе распачалі трэцюю крымінальную справу паводле арт. 411 КК (злоснае непадпарадкаванне патрабаванням адміністрацыі папраўчай установы, які выконвае пакаранне ў выглядзе пазбаўлення волі).
У чэрвені 2021 года суд Маскоўскага раёна Брэста прыгаварыў Шарэнда-Панасюк да 2 гадоў пазбаўлення волі ва ўмовах агульнага рэжыму па арт. 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта).
У красавіку 2022 года актывістку прыгаварылі яшчэ да 1 года зняволення паводле ч. 1 арт. 411, у кастрычніку 2023-га — да такога ж тэрміну паводле таго ж артыкула.
21 сакавіка Камітэт ААН па ліквідацыі дыскрымінацыі жанчын заклікаў беларускія ўлады прыняць тэрміновыя меры для абароны Шарэнда-Панасюк. Гэта першы падобны выпадак па справах супраць Беларусі.
Раней муж, які знаходзіцца з дзецьмі ў эміграцыі, паведамляў, што Шарэнда-Панасюк “мінімум 32 разы змяшчалася ў нечалавечыя ўмовы” штрафнога ізалятара і карцэра, а яшчэ “каля 150 дзён” правяла ў памяшканні камернага тыпу.