У Палескім лясгасе гарыць 50 га балоцістай мясцовасці — Мінлясгас

10 верасня, Позірк. Дзяржлесахова тушыць буйны пажар у Палескім лясгасе. На ліквідацыю ачага сцягнуты сілы 5 лясгасаў, паведамляе Міністэрства лясной гаспадаркі.

Па папярэдніх дадзеных, гарыць каля 50 га аб балоцістай мясцовасці. На ліквідацыі задзейнічана шэсць усюдыходаў, больш за дзесятак адзінак іншай тэхнікі. Прыцягнуты сілы авіяцыі МНС.

“Кіраўніцтва Мінлясгаса ўзяло развіццё сітуацыі на ручны кантроль. Ідэалагічнаму актыву Брэсцкага ДВЛГА даручана арганізаваць палявы лагер з гарачым харчаваннем, а таксама рэгулярны падвоз паліва. Відавочна, што бліжэйшую ноч дзяржлесахове давядзецца правесці ў няпростых умовах”, — удакладняе міністэрства.

Прычына пажару пакуль не ўстаноўлена. Па здагадцы Мінлясгаса, прычынай узгарання стала неасцярожнае абыходжанне з агнём.

Раней МНС Беларусі аб’явіла аб штармавым папярэджанні і заявіла, што 9–10 верасня на большай частцы тэрыторыі Гомельскай і Магілёўскай абласцей захоўваецца надзвычайная пажарная небяспека.

Фактарамі небяспекі, паводле звестак МНС, можа стаць узнікненне пажараў у прыродных экасістэмах, распаўсюджванне агню на населеныя пункты, лініі ЛЭП і сувязі.

За суткі з 6 раніцы 8 верасня ліквідавана 16 лясных пажараў на агульнай плошчы 5,351 га, пяць тарфяных пажараў на агульнай плошчы 0,097 га і 73 пажары травы і кустоў на агульнай плошчы 11,998 га.

Надзвычайная пажарная небяспека адзначана на большай частцы тэрыторыі Гомельскай і Магілёўскай абласцей ужо некалькі дзён.