На мяжы з Польшчай выняты чарговы беспілотнік, да затрымання парушальнікаў прыцягнулі АМАП

11 верасня, Позірк. У ноч на 11 верасня на мяжы з Польшчай “з прыцягненнем АМАП” затрымалі двух жыхароў Брэсцкай вобласці, паведамляе прэс-служба Дзяржпагранкамітэта.

Сцвярджаецца, што ў іх вынятыя самаробны беспілотнік самалётнага тыпу з парашутам, прызначаныя для запуску апарата тросы, чатыры акумулятарныя батарэі, цеплавізар і “таварна-матэрыяльныя каштоўнасці”.

Паводле інфармацыі ведамства, у дачыненні да затрыманых распачаты адміністрацыйны працэс за парушэнне памежнага рэжыму, кожнаму з іх пагражае штраф да 20 базавых велічыняў (800 рублёў).

Дзяржпагранкамітэт нагадаў, што папярэдні падобны выпадак на мяжы з Польшчай адбыўся 30 жніўня, тады была знойдзена схованка са складовымі часткамі беспілотнікаў. “Ад пачатку жніўня гэта ўжо шосты факт спынення брэсцкімі пагранічнікамі супрацьпраўнай дзейнасці з выкарыстаннем БЛА”, — гаворыцца ў паведамленні.

1 красавіка набыў моц указ ад 25 верасня 2023 года № 297 “Аб дзяржаўным уліку і эксплуатацыі грамадзянскіх беспілотных лятучых апаратаў”, якім забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.

Акрамя таго, незаконнае ўтрыманне і выкарыстанне беспілотнікаў у памежнай зоне або памежнай паласе з’яўляюцца парушэннем памежнага рэжыму і прыводзяць да адміністрацыйнай адказнасці.