Міжнародная федэрацыя барацьбы змякчыла патрабаванні для беларускіх спартсменаў

26 верасня, Позірк. Змякчыць крытэрыі допуску для барцоў і абслуговага персаналу з Беларусі і Расіі вырашыла 24 верасня Міжнародная федэрацыя барацьбы (UWW).

На будучых турнірах UWW для прызнання спартоўца з Беларусі ці Расіі недапушчаным да спаборніцтваў будуць разглядацца толькі “доказы прамога вайсковага ўдзелу ў вайне супраць Украіны або публічныя заявы [у пісьмовай або вуснай форме] на падтрымку вайны і/або яе прамоўтэраў або ўдзельнікаў”.

Усе раней прынятыя рашэнні аб нядопуску беларусаў і расіян Федэрацыя перагледзіць у адпаведнасці з новымі крытэрамі.

Беларускія і расійскія барцы, дапушчаныя да спаборніцтваў, “працягнуць выступаць пад нейтральным сцягам у якасці нейтральных спартоўцаў”, выкарыстоўваць сімволіку дзвюх краін па-ранейшаму забаронена.

Рашэнне аб вяртанні міжнародных спаборніцтваў у Беларусь і РФ не прымалася.

28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расейскі і беларускі спорт апынуўся амаль у поўнай ізаляцыі.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартоўцу нельга забараняць удзельнічаць у спаборніцтвах “толькі праз ягоны пашпарт”.

28 сакавіка МАК выпусціў заяву, у якой рэкамендаваў міжнародным федэрацыям у тыпах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.

З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.