Ва ўзросце 60 гадоў памёр былы дырэктар мінскага аэрапорта Харанека, пры якім быў пасаджаны самалёт Ryanair

18 кастрычніка, Позірк. Ва ўзросце 60 гадоў “пасля працяглай цяжкай хваробы” памёр былы дырэктар Нацыянальнага аэрапорта Мінск Вячаслаў Харанека, паведаміла прэс-служба аэрапорта.

Харанека ўзначальваў аэрапорт з 3 лютага 2020 года да 22 жніўня 2024-га. Афіцыйнае паведамленне аб яго адстаўцы “па стане здароўя” з’явілася амаль праз месяц, 18 верасня. Адзначалася, што пад кіраўніцтвам Харанекі “прадпрыемства прайшло складаны этап аднаўлення эканамічнай і вытворчай сітуацыі пасля сусветнай пандэміі і санкцыйных абмежаванняў”, “рэалізаваны комплекс антыкрызісных мер па забеспячэнні бесперабойнай працы прадпрыемства і падтрыманні працаздольнасці ўсёй інфраструктуры”, “фінансава-гаспадарчая дзейнасць аэрапорта стабілізаваная, і перад прадпрыемствам стаяць задачы ў галіне далейшага развіцця”.

Да прызначэння кіраўніком аэрапорта Харанека быў намеснікам генеральнага дырэктара па тэхнічным развіцці — галоўным інжынерам.

Харанека нарадзіўся ў Мінску 1 ліпеня 1964 года. Выпускнік Самаркандскага вышэйшага ваеннага аўтамабільнага каманднага вучылішча ім. Вярхоўнага Савета Узбекскай ССР. У авіяцыі адпрацаваў больш за 30 гадоў.

23 траўня 2021 года ў аэрапорце здзейсніў вымушаную пасадку самалёт ірландскай авіякампаніі Ryanair, які рухаўся з Афін у Вільнюс праз беларускую паветраную прастору. Пілоты былі дэзінфармаваныя паведамленнем аб выбуховай прыладзе на борце і прызямліліся ў Мінску. У самалёце знаходзіўся апазіцыйны на той момант блогер Раман Пратасевіч з тагачаснай сяброўкай, грамадзянкай Расеі Соф’яй Сапега. Яны былі затрыманыя і пасля асуджаныя ў крымінальным парадку.

На прэс-канферэнцыі ў лістападзе 2023 года Харанека адзначаў, што санкцыі дэмакратычных краін Захаду паўплывалі на працу аэрапорта: да пачатку пандэміі кавіду і іх увядзення аэрапорт штогод абслугоўваў 5 млн пасажыраў, а за 10 месяцаў 2023 года было перавезена 2 млн 150 тыс. пасажыраў.

Паводле яго слоў, 97% абсталявання, тэхнікі для абслугоўвання рэйсаў імпартнай вытворчасці. Спецыялісты аэрапорта “паспяхова знайшлі шляхі правядзення тэхнічнага абслугоўвання, рамонту, пытанняў у перыяд кавіду; санкцый па абслугоўванні аэрадрома, забеспячэнні яго бяспекі не ўзнікала”.

“Аэрапорт працуе. Нам не страшныя санкцыі. Мы знайшлі шляхі для выканання ўсіх пастаўленых задач, і будзем развівацца з нашымі партнёрамі, Расійскай Федэрацыяй у першую чаргу”, — падсумаваў Харанека.

У ліпені 2022 года ён паведаміў, што ў сувязі з эканамічнай сітуацыяй аэрапорт увёў прастой для зменнага персаналу і перавёў на чатырохдзённы працоўны тыдзень адміністрацыйных работнікаў.