Беларусь у бязвізавым парадку наведала на 18% менш жыхароў краін ЕС, чым тыднем раней

11 лістапада, Позірк. З 4 па 11 лістапада (на 6 раніцы) Беларусь у бязвізавым парадку наведала 3.635 жыхароў краін ЕС (тыднем раней — 4.440), сведчаць звесткі Дзяржаўнага пагранічнага камітэта.

Такім чынам, колькасць наведванняў знізілася за тыдзень на 18 працэнтаў.

За тыдзень у Беларусь прайшлі 1.467 грамадзян Літвы (2.358), 494 грамадзяніны Польшчы (466), Латвіі — 1.205 (1.061) і 469 грамадзян з іншых еўрапейскіх дзяржаў (555).

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы.

19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы. Большасць з іх рэжым Лукашэнкі лічыць “недружалюбнымі” за тое, што ўвялі санкцыі або далучыліся да іх.

Згодна з апублікаванай 17 ліпеня заявай Міністэрства замежных спраў, гаворка аб жыхарах Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембург Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Яны могуць уязджаць у Беларусь без візы праз усе наземныя і паветраныя міжнародныя пункты пропуску “па сапраўдных дакументах”, знаходзіцца на беларускай тэрыторыі “не больш за 30 сутак з дня ўезду”.