Магутнасць выбуху на Светлагорскім ЦКК складала каля 680 кг у трацілавым эквіваленце — Генпракуратура
29 лістапада, Позірк. Пракуратура Гомельскай вобласці падтрымала ў судзе Светлагорскага раёна дзяржаўнае абвінавачанне па крымінальнай справе намесніка начальніка цэха рэгенерацыі ААТ “Светлагорскі цэлюлозна-кардонны камбінат”, якому інкрымінавана парушэнне правілаў аховы працы, якое пацягнула па неасцярожнасці смерць трох чалавек, паведаміла Генеральная пракуратура.
Фігурант крымінальнай справы прыгавораны да 5 гадоў пазбаўлення волі па ч. 3 арт. 306 КК (парушэнне правілаў аховы працы, якое пацягнула па неасцярожнасці смерць двух або больш асоб). Кампенсацыя маральнай шкоды на карысць пацярпелых вызначана ў памеры 560 тыс. рублёў (14 тыс. базавых велічынь).
Паводле звестак Генпракуратуры, абвінавачаны 7 чэрвеня 2023 года “даручыў сваім падначаленым правесці хімічнае прамыванне перакісам вадароду пасудзіны, якая працуе пад высокім ціскам”. Ён “дакладна ведаў, што ў тэхнічнай дакументацыі выкарыстанне дадзенага небяспечнага рэагента не было прадугледжана”. “Нягледзячы на гэта, абвінавачаны даручыў рабочым выканаць такую працэдуру”, — адзначаецца ў прэс-рэлізе. Віну абвінавачаны прызнаў часткова.
Пры правядзенні работ здарылася самаадвольная ланцуговая экзатэрмічная рэакцыя, якая справакавала выбух магутнасцю каля 680 кг у трацілавым эквіваленце.
8 чэрвеня 2023 года Следчы камітэт паведаміў пра гібель трох чалавек у выніку аварыі на Светлагорскім ЦКК, якая адбылася днём раней, яшчэ двое атрымалі “цялесныя пашкоджанні”.
Загінулыя — супрацоўнікі прадпрыемства ва ўзросце 31, 24 і 42 гадоў.
Паводле звестак следства, у цэху выпарной станцыі па вытворчасці талавага алею “падчас правядзення тэхнічных работ” здарылася ўспышка газапаветранай сумесі”. Шкода ацэненая больш чым у 7 млн рублёў.
“Правяраецца версія фармавання выбуховай газапаветранай сумесі падчас правядзення рамонтна-ачышчальных работ без рэгламенту, а таксама версія аб дапушчаных парушэннях у тэхналагічным працэсе. Паўторны і дэталёвы агляд месца здарэння будзе праведзены пасля ліквідацыі наступстваў аварыі і калі будзе забяспечана бяспека працы следча-аператыўнай групы”, — сказаў тады прадстаўнік СК.
7 чэрвеня начальнік Светлагорскага раённага аддзела па надзвычайных сітуацыях Андрэй Высоцкі паведаміў, што падчас пошукава-выратавальных работ на месцы аварыі на ЦКК “знойдзеныя парэшткі меркавана траіх чалавек”.
Спачатку крымінальная вытворчасць была распачатая па арт. 302 КК (парушэнне правілаў вытворча-тэхнічнай дысцыпліны, правілаў бяспекі на выбухованебяспечных прадпрыемствах або ў выбухованебяспечных цэхах альбо правілаў бяспекі выбухованебяспечных работ). Пасля артыкул абвінавачвання быў зменены.
Прысуд можа быць абскарджаны і апратэставаны.
Светлагорскі ЦКК — буйны вытворца сульфатнай беленай цэлюлозы, гофракардону, гофрашуфлядак, паперы для гафрыравання і іншых прадуктаў з першасных і другасных папяровых валокнаў.
Мясцовая тэлекампанія “Ранак”, якая паведаміла пра выбух на прадпрыемстве, была разгромленая ўладамі.