У Лукашэнкі ёсць асабісты “ядзерны чамаданчык” з “чырвонай кнопкай”, сцвярджае Вальфовіч

6 снежня, Позірк. Ядзерную зброю, якая размешчана на тэрыторыі Беларусі, мае права ўжыць толькі Аляксандр Лукашэнка, заявіў дзяржаўны сакратар Савета бяспекі Аляксандр Вальфовіч журналістам дзяржСМІ ў кулуарах мінскага Палаца незалежнасці, дзе 6 снежня пройдзе пасяджэнне Вышэйшага дзяржсавета Саюзнай дзяржавы (СД).

Паводле слоў чыноўніка, “у кожнага прэзідэнта”, Лукашэнкі і Уладзіміра Пуціна, ёсць “свая чырвоная кнопка, свой партфель, свой ядзерны чамаданчык”.

Вальфовіч адзначыў, што Беларусь не робіць стаўку на “мілітарызацыю краіны” і не разглядае нікога ў якасці “патэнцыйнага ворага і агрэсара”.

“І Расія, і Беларусь заўсёды былі за мір, прыязнае вырашэнне ўсіх пытанняў, узаемапаважлівае стаўленне да суверэнітэту ўсіх дзяржаў. І рашэнне задач на карысць нашых народаў для забеспячэння міру і бяспекі нашых дзяржаў”, — сказаў дзяржсакратар Савета бяспекі.

Раней расійскі бок неаднаразова заяўляў, што размешчаная на тэрыторыі Беларусі ядзерная зброя застаецца пад кантролем Масквы.

Аб’яднанне былых сілавікоў BelPol 24 лістапада выпусціла фільм-расследаванне, у якім заявіла аб адсутнасці доказаў размяшчэння на тэрыторыі Беларусі ядзернай зброі.

Чакаецца, што на пасяджэнні Вышэйшага дзяржсавета СД, якое пройдзе з удзелам прэзідэнта РФ Пуціна, сярод іншага будзе разгледжаны праект дагавора аб гарантыях бяспекі Расіі і Беларусі, якія пацвярджаюць гатоўнасць бакоў выкарыстоўваць ядзерную зброю ў адказ на “знешнюю агрэсію”.

19 лістапада Пуцін падпісаў Асновы дзяржаўнай палітыкі ў галіне ядзернага стрымлівання, у якой сярод іншага згадваецца Беларусь. У дакуменце пазначана, што Масква “пакідае за сабой права” выкарыстоўваць ядзерную зброю ў адказ на “прымяненне супраць яе і (або) яе саюзнікаў ядзернай і (або) іншых відаў зброі масавага паражэння, а таксама ў выпадку агрэсіі супраць Расійскай Федэрацыі і (або) Рэспублікі Беларусь як удзельнікаў Саюзнай дзяржавы з ужываннем звычайнай зброі, якая стварае крытычную пагрозу іх суверэнітэту і (або) тэрытарыяльнай цэласнасці”.

Пра тое, што адаптаваная да “новых рэалій” дзяржпалітыка Расіі “дапускае магчымасць прымянення ядзернай зброі ў адказ на агрэсію супраць Беларусі”, заявіў міністр абароны РФ Андрэй Белавусаў 23 кастрычніка ў Мінску на пасяджэнні сумеснай калегіі двух вайсковых ведамстваў.

Беларускія і расійскія чыноўнікі раней заяўлялі, што да пасяджэння Вышэйшага дзяржсавета Саюзнай дзяржавы плануецца падрыхтаваць двухбаковую дамову аб гарантыях бяспекі.

Кіраўнік другога дэпартамента краін СНД МЗС РФ Аляксей Палішчук у інтэрв’ю “РИА Новости” заяўляў, што гэтая дамова “пацвердзіць гатоўнасць Расіі і Беларусі выкарыстоўваць усе наяўныя ў іх арсенале сілы і сродкі ў адказ на знешнюю агрэсію”. “У тым ліку — у выключных выпадках — ядзерная зброя, як пра гэта сёлета 25 верасня заявіў прэзідэнт Расіі”, — дадаў ён.

Выступаючы 2 верасня перад студэнтамі Акадэміі кіравання, міністр замежных спраў Беларусі Максім Рыжанкоў адзначыў, што ў дагавор аб гарантыях бяспекі будуць закладзены прынцып выкарыстання ядзернага і звычайнага ўзбраення, а таксама іншыя метады абароны Беларусі і РФ.

25 верасня на пасяджэнні Савета бяспекі Расіі было абвешчана пра абнаўленне ядзернай дактрыны РФ. Пуцін сярод іншага паведаміў, што Масква “пакідае за сабой права” ўжыць ядзерную зброю ў выпадку агрэсіі супраць Беларусі. “З беларускім бокам, з прэзідэнтам Беларусі ўсе гэтыя пытанні ўзгодненыя. У тым ліку калі праціўнік, выкарыстоўваючы звычайную зброю, стварае крытычную пагрозу нашаму суверэнітэту”, — сказаў прэзідэнт РФ.

Пасля Лукашэнка заявіў у каментары тэлеканалу “Россия 1”, што асабіста ўдзельнічаў у працэсе абнаўлення ядзернай дактрыны РФ.

Размешчаная ў Беларусі расійская тактычная ядзерная зброя (ТЯЗ) можа быць ужытая толькі з дазволу Крамля, вынікала з заяваў Лукашэнкі 8 кастрычніка ў Маскве перад пасяджэннем Савета кіраўнікоў дзяржаў СНД.