Урад увёў ліцэнзаванне на вываз бульбы — яе сабрана ў паўтара раза менш, чым летась

12 снежня, Позірк. Урад на тры месяцы ўвёў ліцэнзаванне на вываз за межы Беларусі бульбы, адпаведную пастанову падпісаў 12 снежня прэм’ер-міністр Раман Галоўчанка.

Як паведамляе прэс-служба ўрада, пастанова прынятая “ў мэтах забеспячэння ў міжсезонны перыяд унутранага рынку сельскагаспадарчай прадукцыяй у поўным аб’ёме”.

“Вываз гэтай прадукцыі незалежна ад краіны паходжання за межы Рэспублікі Беларусь будзе ажыццяўляцца па разавых ліцэнзіях, якія выдаюцца Міністэрствам антыманапольнага рэгулявання і гандлю па ўзгадненні з Мінсельгасхарчам, аблвыканкамамі і Мінскім гарвыканкамам”, — гаворыцца ў паведамленні.

Удакладняецца, што рашэнні аб выдачы ліцэнзій будуць прымацца “ўпаўнаважанымі органамі, зыходзячы з ацэнкі суадносін свабодных рэсурсаў гэтай прадукцыі ў Рэспубліцы Беларусь і патрэбы краіны ў ёй на момант узгаднення ліцэнзіі”.

Паводле звестак Белстата, на 1 лістапада 2024 года ў Беларусі было сабрана 534,8 тыс. тон бульбы пры сярэдняй ураджайнасці 302 цэнтнеры з гектара. Пры гэтым на аналагічную дату 2023-га было накапана 827,2 тыс. тон пры сярэдняй ураджайнасці 358 ц/га.

Такім чынам, агульны ўраджай бульбы знізіўся ў 1,55 разы.

Амаль у 1,5 раза (на 49,06%) выраслі цэны на бульбу ў Беларусі ў студзені — кастрычніку 2024 года.

10 кастрычніка стала вядома, што ў Беларусі на тры месяцы ўведзена ліцэнзаванне на вываз за межы краіны белакачаннай капусты, яблыкаў і цыбулі рэпчатай.

Сцвярджалася, што дакумент падпісаны “ў мэтах забеспячэння ўнутранага рынку сельскагаспадарчай прадукцыяй у міжсезонны перыяд у поўным аб’ёме”.

8 кастрычніка ўрад падоўжыў на чарговыя паўгода ліцэнзаванне вывазу з Беларусі збожжавых.