Беларускія вайскоўцы трэніруюцца ў Іране разам з прадстаўнікамі КВІР

18 снежня, Позірк. У правінцыі Бушэр на поўдні Ірана 16 снежня пачаўся сумесны тыднёвы лагер па парашутным спорце, у ім прымаюць удзел “элітныя каманды” Узброеных сіл ісламскай дзяржавы і беларускай арміі, паведамляе выданне Tehran Times.

Адзначаецца, што шэсць каманд вайсковых парашутыстаў з абедзвюх краін “прымаюць удзел у серыі спаборніцтваў, накіраваных на ўмацаванне дружбы і абмен каштоўным вопытам”.

У склад каманд уваходзяць члены Корпуса вартавых ісламскай рэвалюцыі (КВІР), Сіл правапарадку, Ваенна-марского флоту і дзве каманды сухапутных войск іранскага войска, а таксама іх беларускія калегі, адзначаецца ў публікацыі. Яны “ўдзельнічаюць у розных парашутных вучэннях і спаборніцтвах, дзеляцца прыёмамі і стратэгіямі для паляпшэння сваіх навыкаў”.

Выданне цытуе намесніка начальніка фізічнай падрыхтоўкі Узброеных сіл Беларусі палкоўніка Дзмітрыя Рабінскага, які адзначыў, што “гэтае партнёрства не толькі ўмацуе ваенныя сувязі, але і павысіць аператыўныя магчымасці ў паветраным і марскім сцэнарыях”.

Корпус вартавых ісламскай рэвалюцыі (КВІР) быў створаны аяталой Хамейні пасля рэвалюцыі 1979 года для абароны Ірана ад унутраных і знешніх пагроз, у тым ліку ад спробы змены рэжыму звонку.

З таго часу КВІР дзейнічае незалежна ад рэгулярнай арміі краіны ў цесным супрацоўніцтве з аяталой.

КВІР падзелены на пяць галінаў: сухапутныя войскі, ваенна-паветраныя сілы, ваенна-марскія сілы, “Басідж” (дабраахвотнае апалчэнне, якое падаўляе іншадумства і сочыць за захаваннем маральных ісламскіх норм) і сілы “Кудс” (сакрэтная разведвальная служба, якая праводзіць аперацыі ў іншых краінах, часта падтрымліваючы мясцовыя ўзброеныя групы).

Звязанымі з КВІР называюць групоўкі “Хізбала” ў Ліване і ХАМАС на палесцінскіх тэрыторыях, а таксама атрады паўстанцаў-хусітаў у Емене.

15 красавіка 2019 года Дзяржаўны дэпартамент ЗША прызнаў КВІР тэрарыстычнай арганізацыяй.

Недалёка ад горада Бушэр знаходзіцца ўзведзеная Расіяй пры актыўным удзеле спецыялістаў з Беларусі і Украіны атамная электрастанцыя, першы блок якой быў падключаны да сеткі ў верасні 2011 года. Яго афіцыйная перадача Расіяй Ірану адбылася ў верасні 2013 года. 10 лістапада 2019 года пачалося будаўніцтва другога энергаблока. Плануецца, што другі і трэці блокі Бушэрскай АЭС будуць уведзеныя ў эксплуатацыю ў 2025 і 2027 годзе адпаведна.