Прэзідэнт Еўрапарламента: Выбары ў Беларусі зноў прадэманструюць адсутнасць свабоды і дэмакратыі

19 снежня, Позірк. “Свабодная і дэмакратычная Беларусь павінна быць часткай дыскусій” у еўрапейскіх палітычных структурах, заявіла прэзідэнт Еўрапарламента (ЕП) Роберта Метсола, выступаючы 19 снежня ў Еўрапейскім Савеце.

Паводле яе слоў, “так званыя прэзідэнцкія выбары, прызначаныя на 26 студзеня, зноў прадэманструюць адсутнасць свабоды і дэмакратыі” ў Беларусі.

“Гэта будзе важны момант, калі людзі звернуць свой позірк на Еўропу. І калі яны гэта зробяць, яны заслугоўваюць убачыць рэальнае еўрапейскае лідарства, рэальныя рашэнні і рэальныя дзеянні”, — адзначыла прэзідэнт ЕП.

У рамках Дзён Беларусі ў Брусэлі (Бельгія) 11 снежня адбылася чацвёртая сустрэча кансультатыўнай групы ЕС з дэмакратычнымі сіламі і грамадзянскай супольнасцю Беларусі. 12 снежня ў Еўрапарламенце прайшла канферэнцыя высокага ўзроўню “Разам з народам Беларусі”, на адкрыцці якой выступілі дэмакратычны лідар Святлана Ціханоўская і Метсола.

Прэзідэнцкая кампанія (асноўны дзень галасавання прызначаны на 26 студзеня 2025 года) праходзіць пад поўным кантролем уладаў. Палітычнае поле краіны цалкам зачышчана ад актыўных апанентаў Аляксандра Лукашэнкі. Прадстаўнікі беларускіх дэмакратычных сіл за мяжой называюць тое, што адбываецца “спецаперацыяй па ўтрыманні ўлады”, праваабаронцы кажуць аб імітацыі канкурэнцыі.

З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.