23 снежня, Позірк. На мяжы з Беларуссю ў Валынскай і Ровенскай абласцях з’явіліся банеры — “пасланні да паўночных суседзяў”, паведамляе ў сваім тэлеграм-канале вайсковы карэспандэнт Андрэй Цапліенка.
Білборды размешчаны ў пунктах пропуску Даманава (з беларускага боку Макраны), Вічаўка (Трушына) і Гарадзішча (Верхні Церабяжоў).
“Украінскія пагранічнікі на беларускай мове заклікаюць сваіх калегаў не падпарадкоўвацца расійскаму рэжыму і супраціўляцца так, як гэта рабілі калісьці іх дзяды падчас вызваленчай вайны супраць савецкай улады”, — адзначыў Цапліенка.
Цяпер, паводле яго слоў, Беларусь “практычна цалкам” знаходзіцца пад кантролем Расіі.
“Адзіным сапраўдным ядром апазіцыйных сіл Беларусі з’яўляецца полк імя Кастуся Каліноўскага, які цяпер ваюе супраць расійскага войска ва Украіне”, — падкрэсліў ваенкар.
На апублікаваных фота намаляваны герб “Пагоня”, а таксама надпісы, якія адсылаюць да Слуцкага паўстання.
Пункты пропуску на гэтай мяжы зачыненыя з 24 лютага 2022 года, калі расійскае войска ўварвалася ва Украіну з беларускай тэрыторыі. З тых часоў украінскія пагранічнікі і вайскоўцы нясуць службу на гэтых рубяжах, каб не дапусціць паўторнай агрэсіі.
Улады Беларусі і асабіста Аляксандр Лукашэнка неаднаразова абвінавачвалі Украіну ў правакацыях і недружалюбных намерах на мяжы.
Слуцкі збройны чын адбыўся ў лістападзе і снежні 1920 года. Каля месяца беларускія ваенныя аддзелы, сфарміраваныя пераважна з мясцовых сялян, трымалі ўладу Беларускай Народнай Рэспублікі на частцы тагачаснай Мінскай губерні і змагаліся з савецкімі войскамі.
