У Беларусь дэпартаваныя двое беспрацоўных братоў, затрыманых ва Украіне

14 студзеня, Позірк. У Беларусь дэпартаваныя двое братоў, затрыманых ва Украіне, паведамляе “Радыё Свабода“.

Мужчыны аштрафаваныя на 13.600 грыўняў кожны (каля 340 долараў).

Пра гэта стала вядома з рашэння суда, апублікаванага 13 студзеня.

Браты (абодва непрацуючыя) былі затрыманыя ўвечары 11 кастрычніка 2024 года ў нежылым сяле Дзянісавічы Кіеўскай вобласці — за тры кіламетры ад мяжы з Беларуссю.

Пры затрыманні яны заявілі, што выпадкова патрапілі на тэрыторыю Украіны, паколькі “ішлі ў лес у грыбы ў раёне пасёлка Аляксандраўка” Нараўлянскага раёна (Гомельская вобласць), гаворыцца ў публікацыі.

“Суддзя да гэтага тлумачэння паставіўся крытычна, бо Аляксандраўка і тое месца, дзе іх знайшлі ўкраінскія пагранічнікі, знаходзяцца ў розных баках”, — адзначае медыя.

Пасля расійскага вайсковага ўварвання з тэрыторыі Беларусі ў лютым 2022 года Украіна закрыла ўсе пункты пропуску на мяжы з Беларуссю. Цяпер на беларуска-ўкраінскай мяжы дзейнічае толькі адзін пункт пропуску — Макраны (з боку Украіны Даманава), які выконвае функцыю гуманітарнага калідора. Прайсці праз яго пешшу могуць толькі грамадзяне Украіны, якія вярнуліся з расійскай акупацыі.