Лукашэнка: “Збеглыя” і іншыя чакаюць, калі здохне прэзідэнт — не дачакаецеся

15 студзеня, Позірк. Пра стан свайго здароўя выказаўся Аляксандр Лукашэнка 15 студзеня на нарадзе па зацвярджэнні Дзяржаўнай інвестыцыйнай праграмы на 2025 год.

“І атрымліваецца, адны “збеглыя” і іншыя чакаюць, калі здохне прэзідэнт: “Вось памрэ, голас у яго не той, цяжка яму гаварыць”… Да не дачакаецеся”, — цытуе Лукашэнку яго прэс-служба.

Звяртаючыся да чыноўнікаў, ён абвінаваціў частку з іх у тым, што “сядзяць як мышы пад венікам і думаюць: пранясе”.

“Хлопцы, не пранясе”, — дадаў 70-гадовы прамоўца.

“Калі вы хочаце працаваць — працуйце, — заявіў ён. — Калі вы не хочаце працаваць — скажыце. Ужо выраслі сярэдняга ўзроўню маладыя хлопцы, якія хочуць працаваць, а не спрабуюць нейкія адпіскі закідваць прэзідэнту”.

Чуткі пра дрэнны стан здароўя Лукашэнкі пачасціліся ў апошнія гады. 9 траўня 2023 года ён выглядаў хваравіта на святкаванні Дня перамогі ў Маскве, а па вяртанні ў той жа дзень у Мінск не змог выступіць з прамовай на ўрачыстым сходзе ў цэнтры Мінска. Пасля гэтага ён на шэсць дзён знік з публічнай прасторы, а затым заявіў, што заразіўся адэнавірусам.

Лукашэнка рэгулярна абвяргае інфармацыю пра пагаршэнне здароўя.