Экс-палітзняволеная Паліна Шарэнда-Панасюк выехала з Беларусі

6 лютага, Позірк. Аб эвакуацыі з Беларусі актывісткі, былой палітвязні Паліны Шарэнда-Панасюк паведаміў кіраўнік фонду салідарнасці BySol Андрэй Стрыжак у сваім тэлеграм-канале.

Паводле яго, цяпер жанчына “знаходзіцца ў бяспецы”.

Аперацыя не была б магчымай без цеснага супрацоўніцтва каманды эвакуацыі BySol з нашымі партнёрамі. Дзякуй усім за выдатную працу”, — адзначыў Стрыжак.

Шарэнда-Панасюк знаходзілася ў няволі з 3 студзеня 2021 года. Праз шэсць месяцаў пасля затрымання суд Маскоўскага раёна Брэста прыгаварыў яе да двух гадоў пазбаўлення волі ва ўмовах агульнага рэжыму паводле арт. 364 (гвалт у дачыненні да супрацоўніка органаў унутраных спраў), 369 (абраза прадстаўніка ўлады) і 368 (абраза прэзідэнта) Крымінальнага кодэкса.

У красавіку 2022 года, кастрычніку 2023-га і кастрычніку 2024-га палітвязню прызнавалі вінаватай паводле арт. 411 КК (злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі). Дадаткова яна атрымала тры гады і адзін дзень пазбаўлення свабоды. Цяпер, а не пазней яна выйшла на волю ў сувязі з тым, што дзень у СІЗА лічыцца за паўтара.

21 сакавіка 2024 года Камітэт ААН па ліквідацыі дыскрымінацыі ў адносінах да жанчын заклікаў беларускія ўлады прыняць тэрміновыя меры для абароны Шарэнда-Панасюк. Гэта стала першым такім выпадкам па справах супраць Беларусі.

На наступны дзень у эфір выйшла інтэрв’ю палітвязню дзяржаўнаму тэлеканалу “Беларусь 1”, у якім яна сказала, што звярнулася да Лукашэнкі з прашэннем аб памілаванні.

Аб вызваленні актывісткі 1 лютага паведаміў яе муж Андрэй Шарэнда, які знаходзіцца за межамі Беларусі.