Колькасць спраў пра банкруцтва павялічылася ў гадавым вымярэнні на 66,38%

11 лютага, Позірк. На 1 лютага ў судах знаходзілася 381 справа аб эканамічнай неплацежаздольнасці (банкруцтве), вынікае з інфармацыі Вярхоўнага суда.

Для параўнання: на 1 студзеня ў судах было 378 такіх спраў, 1 снежня — 363, 1 лютага 2024 года — 229. Такім чынам, за месяц іх колькасць павялічылася на 0,79%, у гадавым вымярэнні — на 66,38%.

Банкруцтвы арганізацый прыватнай формы ўласнасці датычыліся 373 спраў (месяцам раней столькі ж), горадаўтваральных і бюджэтаўтваральных дзяржаўных арганізацый — 25 (28).

У студзені прынятае рашэнне аб прызнанні банкрутам і адкрыцці ліквідацыйнай вытворчасці ў дачыненні да Чэрвеньскага дрэваапрацоўчага камбіната (Мінская вобласць).