За тыдзень у Беларусь прыбыло больш за 5,7 тыс. грамадзян Украіны — ДПК

14 лютага, Позірк. За тыдзень (з 6:00 7 лютага да 6:00 14 лютага) у Беларусь прыбыў 5.741 грамадзянін Украіны (тыднем раней — 5.820), сведчыць праведзены Позіркам аналіз звестак Дзяржаўнага памежнага камітэта.

Непасрэдна праз мяжу з Украінай — пяць чалавек, транзітам праз Польшчу праехалі 4.376 чалавек (4.716), Літву — 1.308 (1.068), Латвію — 52 (36).

Усяго з 24 лютага 2022 года ў Беларусь прыбылі 317.057 грамадзян Украіны: праз украінска-беларускую мяжу — 15.994, транзітам праз Польшчу — 233.494, праз Літву — 60.656, праз Латвію — 6.913.

Паводле інфармацыі Дзяржпамежкамітэта, за 2024 год у Беларусь уехаў 134.561 грамадзянін Украіны. У прыватнасці, як сцвярджалася, з тэрыторыі Украіны гэта зрабілі 68 чалавек, транзітам праз Польшчу — 107.154, Літву — 25.362, Латвію — 1.977. Паводле прыблізных разлікаў Позірку, у 2023 годзе ў Беларусь уехала больш за 71 тыс. грамадзян Украіны, такім чынам, за год іх колькасць вырасла прыкладна ў 1,9 разы.

“Дзяржпамежкамітэт Беларусі займаецца несумленнай падачай лічбаў і чыстай маніпуляцыяй”, — заявіў у інтэрв’ю Позірку ў лютым мінулага года на той момант пасол па асаблівых даручэннях МЗС Украіны па Беларусі Ігар Кізім. Паводле яго, гаворка ідзе пра звычайныя паездкі грамадзян Украіны ў Беларусь.

Дыпламат адзначыў, што ў адкрытых крыніцах звестак пра колькасць украінцаў, якія выехалі з Беларусі, знайсці немагчыма. “Сумленным і прыстойным з боку ДПК было б даваць гэтую статыстыку”, — лічыць ён.

Паводле ААН на 16 студзеня 2024 года, па ўсім свеце налічвалася 6.863.400 украінскіх уцекачоў. З іх 6.303.200 былі зарэгістраваныя ў Еўропе, 560.200 — за яе межамі.