Літоўскія чыгункі прыпынілі транзіт рапсавага алею з Беларусі пасля расследавання БРЦ

19 лютага, Позірк. Кампанія LTG Cargo, якая ўваходзіць у дзяржаўную групу Літоўскай чыгункі (ЛЧ), спыніла транзіт праз краіну прадукцыі беларускага прадпрыемства “Аграпрадукт”, паведамляе delfi.lt спасылкай на 15min.

Раней у гэты ж дзень, 19 лютага, было апублікаванае расследаванне Беларускага расследвальніцкага цэнтра і ягоных партнёраў, у якім сцвярджаецца, што Расія вывозіць з акупаваных украінскіх тэрыторый насенне рапсу і прадае яго ў Беларусь, дзе з яго вырабляецца алей, які ў тым ліку экспартуецца ў краіны Еўрасаюза.

Паведамляецца, што LTG Cargo пачала ўнутранае расследаванне.

Паводле даных LTG Cargo, у 2024 годзе транзітам праз Літву перавезена амаль 50 тыс. тон рапсавага алею вытворчасці “Аграпрадукта“, толькі за апошні квартал мінулага года ў гэтую краіну было ўвезена 47 тыс. тон беларускага рапсавага алею. Згодна інфармацыі з адкрытых крыніц, “Аграпрадукт“ у год вырабляе каля 300 тыс. т алею, 80% якога экспартуецца.

Як вынікае з расследавання, ТАА “Аграпрадукт” з Брэсцкай вобласці ў 2022 годзе прыкладна ў два разы ў параўнанні з 2021 годам павялічыў экспарт рапсавага алею ў ЕС. Поўнамаштабнае расійскае ўварванне ва Украіну пачалося ў лютым 2022 года.

Сцвярджаецца, што выкарыстоўваецца не толькі беларуская, але і імпартная сыравіна, у прыватнасці з акупаваных тэрыторый.

Паводле звестак “Супольнасці чыгуначнікаў Беларусі”, у 2024 годзе ў Літву і Латвію паступіла прыкладна па 50 тыс. т прадукцыі беларускага вытворцы. З іх 30 тыс. і 2 тыс. т адпаведна прызначалася для ўнутраных рынкаў гэтых краін.

У Латвію ў першай палове 2024 года, згодна звестак Еўрастата, было ўвезена 68,9 тыс. т рапсавага алею з Беларусі.