СК заявіў пра “хвалю атручванняў тэхнічнымі вадкасцямі” ў Мінскай вобласці

19 сакавіка, Позірк. З пачатку года ў Мінскай вобласці пачасціліся выпадкі атручвання алкагольнымі сурагатамі, у выніку “хвалі атручванняў тэхнічнымі вадкасцямі” загінулі чатыры чалавекі, паведамляе прэс-служба Следчага камітэта.

Адзначаецца, што ведамства “праводзіць праверкі па кожным інцыдэнце”.

“У Барысаўскім раёне двое мужчын памерлі пасля ўжывання вадкасці для ачысткі шкла і шчаўевай кіслаты, памылкова прынятай за спіртное. У Мінскім раёне мужчына памёр у бальніцы пасля ўжывання шклоамывальнай вадкасці”, — гаворыцца ў паведамленні.

Загінулым было 39, 62 і 60 гадоў адпаведна.

Аб чацвёртым смяротным выпадку не згадваецца.

Пры гэтым адзначаецца, што ў бальніцы пад наглядам урачоў знаходзіцца 48-гадовы жыхар Мінскага раёна, які “пасля сваркі з жонкай” выпіў у гаражы каля 100 мл тармазной вадкасці.

Ведамства заклікала грамадзян “праяўляць пільнасць” і “звяртаць увагу на знешні выгляд бутэлькі, этыкетку, кансістэнцыю, колер і пах напою”. “Не ўжывайце вадкасць, калі яна выклікае ў вас падазрэнні”, — падкрэслівае СК.