У начным ДТЗ пад Пружанамі загінуў 39-гадовы кіроўца

23 сакавіка, Позірк. Чарговае дарожна-транспартнае здарэнне са смяротным зыходам адбылося 23 сакавіка ў Пружанскім раёне, паведамляе ўпраўленне ўнутраных спраў Брэсцкага аблвыканкама.

Паводле папярэдняй інфармацыі, каля 02:30 гадзін 39-гадовы мясцовы жыхар, кіруючы аўтамабілем “Фальксваген” на аўтадарозе Р-85 Слонім — Высокае, выехаў на паласу сустрэчнага руху, дзе сутыкнуўся з грузавіком “DAF”.

“У выніку ДТЗ кіроўца легкавога аўтамабіля памёр ва ўстанове аховы здароўя. Следствам будзе дадзеная прававая ацэнка”, — гаворыцца ў паведамленні.

За рулём аўтамабіля “DAF” знаходзіўся 25-гадовы кіроўца.

Раней “Позірк” паведамляў, што агульная колькасць аўтамабільных аварый у Беларусі ў 2024 годзе павялічылася на 8,8% у параўнанні з 2023-м (з 3.173 да 3.453). Загінула ў гадавым вымярэнні на 0,5% менш чалавек (434 супраць 436).

З віны кіроўцаў у стане алкагольнага або наркатычнага ап’янення ў 2024 годзе адбылося 226 дарожна-транспартных здарэнняў — на 5,8% менш, чым у 2023-м (240), сведчыць праведзены “Позіркам” аналіз даных Нацыянальнага статыстычнага камітэта.

Летась на 15% вырасла колькасць аўтааварый з удзелам маладых кіроўцаў (стаж да аднаго года), заявіў 12 сакавіка міністр унутраных спраў Іван Кубракоў.

Паводле інфармацыі прэс-службы МУС, у 2024 годзе 93 кіроўцы (у тым ліку 15 нецвярозых) уцякло з месцаў ДТЗ, дзе былі пацярпелыя; у гэтых аварыях загінула 11 чалавек, атрымала траўмы — 89.

У 2023 годзе на тэрыторыі Беларусі адбылося 3.173 дарожна-транспартныя здарэнні — на 0,4% менш, чым у 2022-м (3.186). Колькасць загінулых на дарогах краіны скарацілася на 6,4% (з 466 да 436). Колькасць параненых у ДТЗ павялічылася на 1% (з 3.384 да 3.417).