Беларус паўстане перад судом у Польшчы за нелегальнае працаўладкаванне замежнікаў

9 красавіка, Позірк. Грамадзянін Беларусі абвінавачаны ў нелегальным працаўладкаванні 14 замежнікаў, у асноўным грамадзян Грузіі, у Дарлаве (Паморскае ваяводства), паведаміла Памежная ахова Польшчы.

Дзевяць замежнікаў аштрафаваныя, у дачыненні да яшчэ пяці, а таксама працадаўцы-беларуса наглядны орган падасць заявы ў суд.

Таксама паведамляецца, што супрацоўнікі паліцыі з Гдыні правялі праверку на прадпрыемстве, якое адпраўляла сваіх супрацоўнікаў на працу на Гданьскую суднаверф. Замежнікі працавалі зборшчыкамі, зваршчыкамі, малярамі, слесарамі, электрыкамі і будаўнікамі. Супрацоўнікі паліцыі ўстанавілі, што 41 іншаземец працаваў нелегальна. Яны прыехалі, у прыватнасці, з Арменіі, Азербайджана, Беларусі, Грузіі, Малдовы і Украіны. Працадаўцы будуць прыцягнутыя да адказнасці праз суд.

У матэрыяле адзначаецца, што з пачатку 2025 года супрацоўнікі Паморскага аддзялення памежнай аховы праверылі амаль 3 тыс. замежнікаў. Устаноўлена, што 450 з іх працавалі нелегальна. Больш чым у 20 выпадках вынесена рашэнне, якое абавязвае замежніка вярнуцца на радзіму.

Раней паведамлялася, што ў канцы 2024 года паліцыя выявіла 34 выпадкі нелегальнага працаўладкавання замежнікаў у Гдыні, сярод іх былі грамадзяне Беларусі.

Адзначалася, што супрацоўнікі паліцыі праверылі законнасць працаўладкавання 329 замежнікаў у дзвюх кампаніях Гдыні. У выніку было ўстаноўлена, што з парушэннем заканадаўства працавалі таксама грамадзяне Калумбіі, Грузіі і Украіны. У асноўным замежнікі былі занятыя ў “вытворчасці мяса, на будаўнічых працах, працавалі трактарыстамі“.

Дакладную колькасць нелегальна працаўладкаваных ведамства тады не назвала.