Міністр абароны Хрэнін наведвае Катар, запланаваныя перагаворы і наведванне вайсковых аб’ектаў

21 красавіка, Позірк. Міністр абароны Віктар Хрэнін 21 красавіка накіраўваўся ў Катар, паведамляе прэс-служба ваеннага ведамства.

Чыноўнік мае намер сустрэцца з вайскова-палітычным кіраўніцтвам і наведаць вайсковыя аб’екты гэтай дзяржавы на Блізкім Усходзе.

Папярэдняя замежная паездка Хрэніна адбылася напрыканцы сакавіка, тады ён наведаў М’янму.

10 лютага эмір Катара шэйх Тамім бен Хамад аль-Тані павіншаваў Аляксандра Лукашэнку ў сувязі з чарговым падаўжэннем паўнамоцтваў. Цягам апошніх гадоў Лукашэнка неаднаразова запрашаў яго наведаць Беларусь, але візіт так і не адбыўся.

На сустрэчы з прэм’ер-міністрам — міністрам замежных спраў Катара Махамедам бін Абдулрахманам бін Джасімам аль-Тані 23 лютага ў горадзе Доха Раман Галоўчанка, які на той момант узначальваў беларускі ўрад (цяпер старшыня праўлення Нацбанка), заявіў, што Мінск гатовы аднавіць “высокую дынаміку супрацы па ўсіх кірунках: ад навукаёмістых вытворчасцей да падрыхтоўкі вайскоўцаў”.

Летась у лістападзе вайскоўцы з Катара наведвалі беларускія аб’екты Ваенна-паветраных сіл і войскаў супрацьпаветранай абароны, у Мінску прайшлі перагаворы аб умацаванні вайсковай супрацы.