МНС правярае гатоўнасць Мінздароўя да абароны насельніцтва ад надзвычайных сітуацый і грамадзянскай абароны

21 красавіка, Позірк. Камісія Міністэрства па надзвычайных сітуацыях 21 красавіка пачала вывучаць “стан гатоўнасці” Міністэрства аховы здароўя “да выканання задач у галіне абароны насельніцтва і тэрыторый ад надзвычайных сітуацый і грамадзянскай абароны”.

Паводле інфармацыі прэс-службы МНС, прадстаўнікі ведамства “разгледзяць пытанні выканання заканадаўства ў галіне пажарнай, радыяцыйнай і прамысловай бяспекі, абароны насельніцтва і тэрыторый ад надзвычайных сітуацый і грамадзянскай абароны, арганізацыі прагназавання і папярэджання надзвычайных сітуацый, навучання ў галіне абароны насельніцтва і тэрыторый ад надзвычайных сітуацый”.

Камісію ўзначальвае першы намеснік міністра па надзвычайных сітуацыях Аляксандр Худалееў. Арганізацыйная нарада ў Мінздароўя 21 красавіка прайшла пад кіраўніцтвам першага намесніка міністра аховы здароўя Юрыя Горбіча.

13 і 14 ліпеня 2024 года непагадзь у Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў. Найбольш ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі. Загінула сем чалавек.

Сітуацыя прадэманстравала негатоўнасць уладаў да рэагавання на такія інцыдэнты.

Начальнік галоўнага ўпраўлення дзяржаўнай сістэмы папярэджання і ліквідацыі надзвычайных сітуацый і грамадзянскай абароны міністэрства Ігар Хадановіч на прэс-канферэнцыі ў Мінску 6 сакавіка заявіў, што што “пры ўзнікненні падобнай буйнамаштабнай, нехарактэрнай” для Беларусі надзвычайнай сітуацыі выяўлены шэраг “праблемных пытанняў, вырашэнне якіх не ў поўнай меры выканальнае ў рамках дзейнага заканадаўства”.