Ціханоўская падзякавала Трампу і Дзярждэпартаменту ЗША за намаганні ў справе вызвалення Зянковіча

30 красавіка, Позірк. Дэмакратычны лідар Святлана Ціханоўская “з вялікай радасцю даведалася пра вызваленне Юрася Зянковіча — беларускага палітвязня і грамадзяніна ЗША, несправядліва асуджанага рэжымам [Аляксандра] Лукашэнкі”.

“Гэта вынік вялікіх намаганняў. Дзякуй Прэзідэнту ЗША [Дональду Трампу], Дзярждэпартаменту і ўсім, хто працаваў дзеля яго вызвалення”, — напісала палітык у сваім тэлеграм-канале.

Разам з тым, адзначыла яна, варта памятаць, што “у беларускіх турмах застаецца больш за 1.200 палітвязняў”.

“Іх трымаюць за кратамі толькі за тое, што яны хацелі праўды, справядлівасці і свабоды. Вызваленне аднаго — гэта крок наперад. Але нашая мэта — свабода для ўсіх”, — падкрэсліла дэмлідар.

Пра вызваленне прыгаворанага ў 2022-м да 11 гадоў пазбазлення волі па палітычна матываванай “справе змоўшчыкаў” беларуска-амерыканскага адваката Юрыя Зянковіча стала вядома ўвечары 30 красавіка.