Палітвязнямі прызнана яшчэ восем чалавек

21 траўня, Позірк. Беларуская праваабарончая супольнасць 21 траўня прызнала палітычнымі зняволенымі яшчэ восем чалавек, вынікае з сумеснай заявы, апублікаванай на сайце цэнтра “Вясна”. Цяпер такі статус маюць 1.189 вязняў.

Палітвязнямі прызнаныя прыгавораныя да пазбаўлення волі Андрэй Сітнікаў (4 гады; арт. 368, 369, 361¹, 130 Крымінальнага кодэкса), Сяргей Дзегцярэнка (3 гады і 5 месяцаў; арт. 361⁴, 130), асуджаныя на невядомыя тэрміны Аляксандр Александроўскі (арт. 130); Яўген Белендык (арт. 130); Аляксандр Быкаў (арт. 368, 369, 3611, 130); Пётр Філіповіч (арт. 368, 130).

Адпаведны статус таксама нададзены ўзятым пад варту Паўлу Бялюціну і Васілю Грачыху (арт. 369, 361¹, 361³).

Праваабаронцы патрабуюць ад уладаў Беларусі неадкладна вызваліць усіх палітвязняў і спыніць рэпрэсіі супраць грамадзян краіны.

Апрача “Вясны” заяву падпісалі Respect-Protect-Fulfill, Human Constanta, “Прававая ініцыятыва” і Беларускі Хельсінкскі камітэт.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 361¹ — стварэнне экстрэмісцкага фарміравання або ўдзел у ім;
• арт. 361³ — удзел на тэрыторыі замежнай дзяржавы ва ўзброеным фарміраванні або ўзброеным канфлікце, ваенных дзеяннях, вярбоўка або падрыхтоўка асоб да такога ўдзелу;
• арт. 361⁴ — садзейнічанне экстрэмісцкай дзейнасці;
• арт. 368 — абраза прэзідэнта;
• арт. 369 — абраза прадстаўніка ўлады.