Стармер: Вызваленне Ціханоўскага — момант надзеі
22 чэрвеня, Позірк. “Гэта выдатная навіна і момант надзеі“, — так ахарактарызаваў выхад на волю Сяргея Ціханоўскага прэм’ер-міністр Вялікабрытаніі Кір Стармер.
“Вызваленне Сяргея Ціханоўскага — гэта напамін, што дэмакратычныя каштоўнасці немагчыма замаўчаць“, — напісаў кіраўнік брытанскага кабінета ў Х (“Твітары“).
Беларускі дэмакратычны лідар, жонка Ціханоўскага Святлана Ціханоўская ўпершыню сустрэлася са Стармерам у сакавіку 2023 года, калі яго Лейбарысцкая партыя знаходзілася ў апазіцыі. Тады абмяркоўваліся пытанні санкцый, прыцягнення рэжыму Лукашэнкі да адказнасці, дапамогі дэмакратычнаму руху.
У ліпені 2024 года Ціханоўская правяла перамовы са Стармерам ужо як з прэм’ер-міністрам Вялікабрытаніі. “Абмеркавалі сітуацыю ўнутры Беларусі, праблему палітвязняў, фармалізацыю стасункаў паміж Вялікабрытаніяй і дэмакратычнымі сіламі Беларусі, падтрымку незалежных СМІ, сумесныя дзеянні на міжнароднай арэне, пытанні, з якімі сутыкаюцца беларусы ў Вялікабрытаніі“, — паведаміў тады “Позірку“ галоўны дарадца дэмлідара Франак Вячорка.
