У ЕС прынялі да ўвагі “нядаўняе вызваленне шэрагу беларускіх палітвязняў”

8 чэрвеня, Позірк. Еўрапейскі саюз “прымае да ўвагі” нядаўняе вызваленне шэрагу беларускіх палітычных зняволеных, заявіла галоўны спікер Еўрапейскай службы знешніх дзеянняў па пытаннях знешняй палітыкі і палітыкі бяспекі Аніта Хіпер.

“Мы працягваем заклікаць рэжым [Аляксандра] Лукашэнкі вызваліць усіх адвольна затрыманых, асабліва тых, хто знаходзіцца ў небяспечных для жыцця ўмовах. Арышты, рэпрэсіі і парушэнні правоў чалавека, якія працягваюцца, павінны быць спыненыя”, — напісала яна ўвечары 7 ліпеня на сваёй старонцы ў сацыяльнай сетцы Х.

Пра тое, што Аляксандр Лукашэнка памілаваў яшчэ 16 зняволеных, якія нібыта здзейснілі “злачынствы ў тым ліку экстрэмісцкай скіраванасці”, стала вядома 2 ліпеня.

8 траўня, на наступны дзень пасля таго, як Лукашэнка абвясціў пра памілаванне 42 чалавек, асуджаных за “злачынствы экстрэмісцкай скіраванасці”, прадстаўнік Еўрапейскай камісіі па замежных справах і палітыцы бяспекі Ануар Эль-Ануні таксама заклікаў безумоўна вызваліць усіх палітычных зняволеных у Беларусі. Было заяўлена, што ў ЕС “прынялі да ўвагі абвяшчэнне пра памілаванне 42 палітычных зняволеных, у тым ліку людзей з хранічнымі захворваннямі і тых, што знаходзяцца ва ўразлівым становішчы”.