Праваабаронцы паведамілі пра пачатак шматлікіх судовых працэсаў па “справе дваровых чатаў”

20 ліпеня, Позірк. Пра пачатак шматлікіх судовых працэсаў па “справе дваровых чатаў” паведамляе праваабарончы цэнтр “Вясна”.

Паводле звестак праваабаронцаў, “некаторыя судовыя працэсы ўжо пачаліся, некаторыя пачнуцца найбліжэйшым часам”.

У паведамленні гаворыцца, што ўвосень 2024 года “па ўсіх рэгіёнах Беларусі пракацілася хваля затрыманняў па справе дваровых чатаў”, якія “нібыта спрабавалі аб’яднацца ў арганізацыю”.

“У тыя ж даты КДБ прызнаў “экстрэмісцкім фарміраваннем” ініцыятыву “Ордэн”, у якую ўваходзяць дваровыя чаты “Злые когтики”, “Сухарево”, “Сеніца2.0”, “Солідарность”, “Вольныя ваўкі”, “Навагрудскія партызаны”, “ВИЛИЯ”, “Скромные матрешки”, “Соседи”, — адзначаюць праваабаронцы.

14 ліпеня цэнтр “Вясна” паведаміў пра пачатак судовага працэсу ў Гродне над пяццю мясцовымі жыхарамі. Іх абвінавачваюць паводле арт. 361⁴ Крымінальнага кодэкса (садзейнічанне экстрэмісцкай дзейнасці) за дачыненне да дваровых тэлеграм-чатаў.

Аб прызнанні згаданых чатаў “экстрэмісцкімі фарміраваннямі” “Позірк” паведамляў 4 лістапада 2024 года.

У той жа дзень стала вядома аб масавых затрыманнях у рамках крымінальнай справы паводле арт. 357 КК (змова ці іншыя дзеянні, учыненыя з мэтай захопу дзяржаўнай улады).

Адзначалася, што рэйды праводзілі супрацоўнікі КДБ.

“Частка людзей знаходзіцца за кратамі, частка — выйшла на волю ў якасці сведак па крымінальнай справе. Вядома, што некаторым затрыманым задавалі пытанні з нагоды дваровых чатаў, якія былі асабліва папулярныя ў паслявыбарчыя часы”, — паведамлялі праваабаронцы.