НАУ прапануе Польшчы ўвесці санкцыі супраць кіраўніцтва ДПК Беларусі

21 ліпеня, Позірк. За дачыненне да міграцыйнага крызісу на мяжы ўвесці санкцыі супраць кіраўніцтва Дзяржаўнага пагранічнага камітэта Беларусі прапануе Польшчы Народнае антыкрызіснае ўпраўленне (НАУ), заявіў яго кіраўнік Павел Латушка падчас стрыму на сваім ютуб-канале.

“Мы ўнеслі ў Міністэрства ўнутраных спраў Польшчы цэлы пакет прапаноў аб увядзенні санкцый у дачыненні да кіраўніцтва пагранічнага камітэта Беларусі, у дачыненні да прапагандыстаў, якія падтрымліваюць гэтую міграцыйную вайну”, — сказаў палітык.

Латушка анансаваў сваю сустрэчу з кіраўніцтвам МЗС Польшчы 21 ліпеня, на якой мае намер закрануць тэму санкцый.

“Я буду адстойваць пазіцыю: нельга закрываць пагранічныя пераходы для людзей, нельга Беларусь блакіраваць, закрываць, не ведаю, там, у нейкім кансервавым банку. Рэагаваць трэба на рэжым, на першапрычыну”, — растлумачыў ён.

Латушка прапануе Варшаве “закрываць таварныя патокі — біць па рэжыме, каб яму гэта вельмі дорага каштавала”, а таксама ініцыяваць, па аналогіі з Літвой, пазоў у Міжнародны суд ААН у сувязі з міграцыйным крызісам.

Міграцыйны крызіс на граніцы Беларусі і краін ЕС прадаўжаецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Праведзены “Позіркам” аналіз даных пагранічных службаў суседніх дзяржаў ЕС паказаў, што з пачатку 2025 года яны прадухілілі 24,3 тыс. спроб мігрантаў незаконна перасекчы мяжу з беларускай тэрыторыі, у тым ліку Польшча — 16,3 тыс.

16 ліпеня міністр нацыянальнай абароны краіны Уладзіслаў Касіняк-Камыш заявіў аб нарастанні агрэсіі з боку мігрантаў, якія спрабуюць трапіць у Польшчу з беларускай тэрыторыі.

17 ліпеня польскі міністр унутраных спраў і адміністрацыі Томаш Семаняк заявіў, што ў Варшаве “вельмі сур’ёзна” ўспрымаюць інцыдэнт, які адбыўся 15 ліпеня, калі ў бок Польшчы праз агароджу на мяжы з Беларуссю кінулі бутэльку з запальнай сумессю.

На гэты момант для пасажырскіх перавозак з Польшчай адкрыты толькі пункт пропуску Цярэспаль (Брэст), для грузавога транспарту — Кукурыкі (Казловічы).

Астатнія пункты пропуску зачыненыя Варшавай як рэакцыя на дзеянні рэжыму Аляксандра Лукашэнкі.