Лукашэнка назваў Марока “перспектыўным партнёрам” Беларусі ў Паўночнай Афрыцы

30 ліпеня, Позірк. Каралеўства Марока з’яўляецца “перспектыўным партнёрам” Беларусі ў “рэгіёне Магрыб і ва ўсёй Паўночнай Афрыцы”, гаворыцца ў віншаванні Аляксандра Лукашэнкі манарху гэтай дзяржавы Махамеду VI з дзяржаўным святам — Днём Трона 30 ліпеня.

“Перакананы, мы маем шырокія магчымасці для раскрыцця патэнцыялу міждзяржаўнага ўзаемадзеяння”, — прыводзіць словы віншавальніка яго прэс-служба.

Адзначыўшы, што гісторыя дыпламатычных адносін паміж краінамі налічвае больш за трыццаць гадоў, ён пацвердзіў “імкненне і надалей развіваць канструктыўныя беларуска-мараканскія сувязі на карысць абодвух народаў”.

У леташнім пасланні каралю Лукашэнку выказваў гатоўнасць Мінска разам з Рабатам актыўна шукаць “перспектыўныя праекты супрацоўніцтва ў сферах гандлю, прамысловай кааперацыі, харчовай бяспекі”.

Афрыканскую дзяржаву ён называў краінай, якая дэманструе “значныя дасягненні ў развіцці эканомікі, павышэнні дабрабыту насельніцтва, карыстаецца заслужаным аўтарытэтам на міжнароднай арэне”.

23 кастрычніка 2024 года паведамлялася, што ў рамках міжнароднай канферэнцыі ICAN 2024, якая праходзіла ў Малайзіі, Беларусь падпісала з Саудаўскай Аравіяй міжурадавае пагадненне аб паветраных зносінах (ухвалена Мінскам 2 кастрычніка), з Кувейтам — мемарандум аб узаемаразуменні ў гэтай сферы, з Марока.

19 мая гэтага года МУС паведамляла, што студэнтаў з Марока, якія ўчынілі бойку ў Гомелі, выправадзяць з Беларусі. Адзначаецца, што ў дачыненні да іх праведзены працэдуры “публічных высылак <…> па месцах вучобы, а таксама ў тэрытарыяльным падраздзяленні міліцыі”.

Бойка паміж грамадзянамі Марока адбылася ў Гомелі ў ноч на 22 красавіка. Па версіі МУС, замежнікі “высвятлялі адносіны з-за бытавога канфлікту”.

Дыпламатычныя адносіны паміж Беларуссю і Марока ўстаноўлены 8 мая 1992 года. У краін няма пасольстваў на тэрыторыі адна адной. Інтарэсы Мінска ў гэтай паўночнаафрыканскай дзяржаве прадстаўляе ганаровы консул.

Паводле інфармацыі прэс-службы МЗС, 27 сакавіка 2024 года Дзмітрый Круты (цяпер кіраўнік Адміністрацыі прэзідэнта), які ўзначальваў тады беларускае дыпламатычнае прадстаўніцтва ў Расіі, і пасол Марока ў РФ і Беларусі па сумяшчальніцтве Лотфі Бушаара “разгледзелі пытанні двухбаковага супрацоўніцтва, у тым ліку абмеркавалі магчымыя крокі па развіццю”.

Круты “канстатаваў назіральны рост тавараабароту, адзначыў зацікаўленасць беларускага боку ў актывізацыі кантактаў па лініі бізнес-супольнасцей дзвюх краін”, Бушаара ў сваю чаргу пацвердзіў “важнасць гандлю”, выказаў гатоўнасць развіваць адносіны ў сельскай гаспадарцы, прамысловасці і інш.

Паводле звестак Абсерваторыі эканамічнай складанасці, якая акумулюе даныя міжнародных арганізацый аб сусветным знешнім гандлі, тавараабарот паміж Беларуссю і Марока ў 2022 годзе складаў 82,2 млн долараў (беларускі экспарт — 60,8 млн, мараканскія пастаўкі — 21,4 млн). Актуальных звестак у адкрытым доступе няма.