АПК параіў беларускім абітурыентам у Польшчы падавацца на “нулявыя курсы” ВНУ для вывучэння мовы

4 верасня, Позірк. У сувязі з увядзеннем у Польшчы з 1 жніўня 2025 года абавязковай моўнай сертыфікацыі на ўзроўні В2 для залічэння ў ВНУ беларускім абітурыентам рэкамендуецца падавацца на “нулявыя курсы“ мясцовых універсітэтаў для вывучэння мовы, што дазволіць рыхтавацца да наступнага навучальнага года і легальна знаходзіцца ў краіне.

Такія рэкамендацыі даў Аб’яднаны пераходны кабінет (АПК) па выніках сустрэчы яго прадстаўніка па нацыянальным адраджэнні Паўла Баркоўскага і спікера Каардынацыйнай рады Арцёма Брухана з дырэктарам консульскага дэпартамента МЗС Польшчы Юстынай Хржаноўскай.

Другой опцыяй, адзначыў АПК, з’яўляецца зварот у прыёмныя камісіі універсітэтаў праз механізм “umowy warunkowe” (дамовы з умовамі), які не быў скасаваны і дазваляе універсітэтам прымаць рашэнне аб залічэнні паводле ўласных патрабаванняў у межах акадэмічнай аўтаноміі.

Паведамляецца, што дасягнута дамоўленасць, у адпаведнасці з якой дзяржаўныя службы Польшчы арганізуюць дадатковыя сесіі экзаменаў па польскай мове (узровень B2) для замежных студэнтаў да канца 2025 года.

Пры гэтым замежныя студэнты, якія падалі дакументы да 1 жніўня, маюць права на залічэнне без сертыфіката аб валоданні мовай.

Паводле інфармацыі АПК, Хржаноўска падкрэсліла на сустрэчы, што змены заканадаўства накіраваныя на зніжэнне злоўжыванняў акадэмічнай сістэмай і павышэнне якасці навучання. Пры гэтым яна адзначыла, што ўзровень беларускіх студэнтаў ацэньваецца высока, яны з’яўляюцца другой па колькасці групай замежных навучэнцаў у польскіх ВНУ (па ўсёй бачнасці, пасля ўкраінскіх. — “Позірк”.).

Пры гэтым, паводле сцвярджэння прадстаўніка МЗС, нягледзячы на абмежаваныя рэсурсы, польскія консульскія службы надаюць пытанням адукацыі беларускіх студэнтаў асаблівую ўвагу. У прыватнасці, захоўваюцца прыярытэтныя чэргі для абітурыентаў у візавых аддзелах польскіх дыпламатычных устаноў, дзейнічае спецыяльная візавая падтрымка для тых, хто паступае на моўныя курсы польскіх ВНУ.