19 верасня, Позірк. Індывідуальныя нейтральныя спартоўцы (ІНС), якія прайшлі кваліфікацыю ў сваіх відах спорту, будуць спаборнічаць на зімовых Алімпійскіх гульнях у італьянскіх гарадах Мілан і Карціна-д’Ампеца ў 2026 годзе на тых жа ўмовах, што і на летняй Алімпіядзе ў Парыжы ў 2024 годзе, паведаміў 19 верасня Міжнародны алімпійскі камітэт (МАК).
Адзначаецца, што адпаведнае рашэнне Выканаўчы камітэт МАК прыняў на сваім пасяджэнні ў Мілане, “разгледзеўшы досвед Алімпійскіх гульняў у Парыжы, у якіх узялі ўдзел 32 спартоўцы з расійскімі ці беларускімі пашпартамі з 10 розных відаў спорту, без якіх-небудзь інцыдэнтаў на спартыўных арэнах або па-за іх межамі”.
Зімовыя Алімпійскія гульні пройдуць з 6 да 22 лютага 2026 года.
28 жніўня стала вядома, што ў іх не змогуць узяць удзел біятланісты з Беларусі і Расіі.
20 снежня 2024 года Міжнародны саюз канькабежцаў дазволіў нейтральным атлетам з Беларусі ўдзельнічаць у адборы на Алімпіяду, прыняўшы шэраг абмежаванняў.
28 лютага 2022 года, праз некалькі дзён пасля пачатку вайны ва Украіне, Міжнародны алімпійскі камітэт заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт апынуўся амаль у поўнай ізаляцыі.
25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”.
28 сакавіка таго ж года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. З аналагічнымі ўмовамі МАК дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024 у нейтральным статусе.
На летняй Алімпіядзе-2024 у Парыжы беларускія атлеты, якія выступалі ў нейтральным статусе, заваявалі чатыры медалі — залатую, дзве срэбныя і бронзавую, заняўшы 50-е месца ў неафіцыйным заліку.
