Кіроўца грузавіка насмерць збіў веласіпедыста ў Магілёўскім раёне

29 верасня, Позірк. Аб чарговым смяротным дарожна-транспартным здарэнні паведамляе прэс-служба Міністэрства ўнутраных спраў.

ДТЗ здарылася 28 верасня каля вёскі Брылі Магілёўскага раёна, супрацоўнікі МУС выявілі цела 57-гадовага веласіпедыста “з прыкметамі наезду аўтамабілем”, адзначае ведамства.

Падкрэсліваецца, што кіроўца з месца здарэння ўцёк.

“Цягам некалькіх гадзін фігуранта ўстанавілі і затрымалі на тэрыторыі Мінскай вобласці. Ім аказаўся 33-гадовы жыхар Пухавіцкага раёна, які здзейсніў наезд, кіруючы грузавіком “Івека”, — гаворыцца ў паведамленні.

МУС звярнула ўвагу, што затрыманы раней больш за 20 разоў прыцягваўся да адміністрацыйнай адказнасці “за правапарушэнні па лініі ДАІ, два разы пазбаўляўся права кіравання за нецвярозае кіраванне”.

“Дзяржаўтаінспекцыя нагадвае: пры здзяйсненні ДТЗ кіроўца абавязаны заставацца на месцы, па магчымасці аказаць дапамогу пацярпеламу, не перамяшчаць транспартны сродак і прадметы, якія маюць дачыненне да справы, паведаміць аб тым, што адбылося, у міліцыю і медыкам”, — адзначыла ведамства.