Беларусь і Батсвана маюць “сур’ёзны патэнцыял” для нарошчвання ўзаемнага гандлю, заяўляе Лукашэнка

30 верасня, Позірк. Беларусь і Батсвана маюць “сур’ёзны патэнцыял для нарошчвання ўзаемнага гандлю і паглыблення двухбаковых сувязяў ва ўсіх сферах”, заявіў Аляксандр Лукашэнка, віншуючы 30 верасня прэзідэнта гэтай афрыканскай дзяржавы Думе Бока з Днём незалежнасці.

Адзначыўшы актывізацыю кантактаў паміж міністэрствамі і дзелавымі коламі дзвюх краін у 2025 годзе, віншавальнік, як паведамляе яго прэс-служба, выказаў надзею, што бакі ў бліжэйшы час выйдуць на “сумесныя праекты ў сферах мадэрнізацыі прамысловасці, забеспячэння харчовай бяспекі, механізацыі сельскай гаспадаркі і іншых, якія маюць прынцыповае значэнне для абедзвюх дзяржаў”.

Назваўшы Батсвану “добрым партнёрам у Паўднёвай Афрыцы”, Лукашэнка запрасіў Бока ў Мінск “у зручны час”.

Паводле сцвярджэння віншавальніка, батсванскі народ “ужо больш за паўстагоддзя прытрымліваецца самастойнай мадэлі дзяржаўнага развіцця”, што дазволіла “дасягнуць значных вынікаў у забеспячэнні росту эканомікі і трываласці палітычнай сістэмы”.

2 ліпеня віцэ-прэм’ер Віктар Каранкевіч абмеркаваў на сустрэчы з міністрам міжнародных адносін (аналаг МЗС) Батсваны Феніа Бутале развіццё аграпрамысловага комплексу, прамысловасці, пастаўкі сельскагаспадарчай, пасажырскай, дарожна-будаўнічай, камунальнай тэхнікі.

Бутале адзначыў, што супрацоўніцтва дзвюх краін “не можа быць зведзена толькі да сельскай гаспадаркі”. Ён заявіў, што ў Батсване “самая лепшая дзелавая атмасфера”, краіна мае “палітычную, эканамічную стабільнасць, высокія эканамічныя рэйтынгі”.

“Мірная перадача ўлады, якая адбылася летась, таксама паказвае, на наш погляд, што інвестар у Батсване абаронены. Наша краіна добра размешчана ў геаграфічным плане, і беларускія інвестары, якія прыходзяць, могуць засноўваць вытворчасці, якія стануць выхадам на рынак не толькі Паўднёвай Афрыкі, але і на афрыканскі рынак у цэлым”, — адзначыў Бутале.

1 ліпеня ў Мінску міністр замежных спраў Максім Рыжанкоў і Бутале дамовіліся працаваць над стварэннем сумеснай камісіі па супрацоўніцтве.

Адзначалася, што бакі “абавязаліся актывізаваць абмен двухбаковымі візітамі, у тым ліку на вышэйшым узроўні, і падкрэслілі неабходнасць актыўнага, арыентаванага на вынікі работы па фарміраванні прадметнага парадку дня для такіх візітаў”.

Лукашэнка, віншуючы Бока з перамогай яго партыі на ўсеагульных выбарах і яго абраннем на вышэйшую пасаду 11 лістапада 2024 года, адзначыў “перспектывы супрацоўніцтва ў забеспячэнні харчовай бяспекі і трансферу тэхналогій у аграпрамысловым комплексе, горназдабыўной прамысловасці інфармацыйна-камунікацыйных тэхналогій”.

Батсвана атрымала незалежнасць ад Вялікабрытаніі 30 верасня 1966 года. У Батсване больш за 10 палітычных партый, аднак усе кіраўнікі дзяржавы прадстаўлялі толькі адну — Дэмакратычную партыю Батсваны.

Між тым на выбарах 2024 года перамагла кааліцыя “У абарону дэмакратычных пераменаў” (АДП), якую ўзначальвае Бока.

Дыпламатычныя адносіны паміж Беларуссю і Батсванай устаноўленыя ў 2003 годзе. Узаемны знешні гандаль блізкі да нуля.