Беларус і італьянец затрыманыя пры ўвозе з Літвы забароненых рэчываў

30 верасня, Позірк. Пры ўвозе з Літвы забароненых рэчываў затрыманыя грамадзяне Беларусі і Італіі, паведамляе Дзяржаўны мытны камітэт (ДМК).

Затрыманыя заязджалі ў Беларусь на рэйсавых аўтобусах праз пункт пропуску Каменны Лог (з сумежнага боку Мядзінінкай), выявіць у іх забароненыя рэчывы дапамаглі службовыя сабакі, адзначае ДМК.

У беларуса “скрутак з псіхатропам” быў знойдзены ў кашальку. Паводле звестак экспертызы, рэчыва аказалася “асабліва небяспечным псіхатропам лізергідам”.

“А ў другім выпадку грамадзянін Італіі схаваў ад мытнага кантролю ў асабістых рэчах здробненае рэчыва са спецыфічным рэзкім пахам. Заключэнне эксперта — рэчыва з’яўляецца небяспечным наркатычным сродкам марыхуанай”, — паведамляе мытня.

Узбуджаные крымінальныя справы паводле арт. 328¹ КК (незаконнае перамяшчэнне праз мытную мяжу Еўразійскага эканамічнага саюза або дзяржаўную мяжу Рэспублікі Беларусь наркатычных сродкаў, псіхатропных рэчываў або іх прэкурсораў або аналагаў).

Паводле даных ДМК, у 2024 годзе канфіскавана 1.622 тоны наркатычных сродкаў і псіхатропных рэчываў — амаль у два разы больш, чым за папярэдні год. Зафіксаваныя 553 факты кантрабанды і незаконнага абароту наркотыкаў, узбуджана 310 крымінальных спраў — на 13% больш, чым у 2023-м.