1 кастрычніка, Позірк. Грамадзянка Германіі, якая прыбыла ў нацыянальны аэрапорт Мінск са Стамбула, не задэкларавала 15 зліткаў золата, паведаміла 1 кастрычніка прэс-служба Дзяржаўнага мытнага камітэта.
Паводле інфармацыі ведамства, яна перасякала мяжу па “зялёным калідоры”, прызначаным для тых, хто накіроўваецца без тавараў, што трэба дэклараваць. Мытнікі “усумніліся ў яе дзеяннях, перанакіравалі жанчыну на “чырвоны калідор”, і пры надглядзе багажу выявілі залатыя зліткі і манету”.
Замежніца паведаміла, што “набывала каштоўнасці на рынках у розных краінах і не ўпэўненая, што яны сапраўды залатыя”.
Экспертыза пацвердзіла, што знойдзеныя ў грамадзянкі Германіі 15 зліткаў агульнай масай больш за 117 грамаў сапраўды залатыя — 999,9 пробы. Залатой таксама выявілася 30-грамовая манета.
Кошт тавараў, паводле інфармацыі беларускага боку, склаў больш за 78 тыс. рублёў (26,1 тыс. долараў паводле актуальнага курсу Нацбанка).
“У дачыненні да грамадзянкі Мінскай рэгіянальнай мытняй распачаты адміністрацыйны працэс у адпаведнасці з ч. 4 арт. 15.5 КаАП Рэспублікі Беларусь. Санкцыя артыкула прадугледжвае адказнасць у выглядзе штрафу ў памеры да 30% (10–30%. — “Позірк”.) кошту прадмета адміністрацыйнага правапарушэння”, — адзначаецца ў паведамленні.
