Ціханоўская пра мужа: Ён не вельмі дыпламатычны чалавек
9 кастрычніка, Позірк. “Мы відавочна не ў канкурэнцыі”, — так дэмакратычны лідар Святлана Ціханоўская апісала ўзаемаадносіны з мужам у палітыцы ў інтэрв’ю Deutsche Welle, апублікаваным 9 кастрычніка.
“У сям’і мы дакладна тандэм. На палітычным полі Сяргею пакуль яшчэ трэба вызначыцца, каб зразумець, хто мы ў адносінах адзін да аднаго”, — дадала яна.
Паводле дэмлідара, муж разумее яе ролю ў палітыцы і не спрабуе яе змяніць: “Зразумела, што яму трэба яшчэ трошкі часу, каб знайсці сваё месца, таму што ёсць вялікая праблема, што людзям, якія трапілі ў турму ў 2020-м годзе, трэба час усвядоміць, што прайшло ўжо пяць гадоў, памяняўся кантэкст, памяняўся кантэкст.
Сяргею Ціханоўскаму “яшчэ трэба шмат чаго даведацца”, сказала яна: “Мы яго паволі навучаем, расказваем, таму што для палітыкі таксама патрэбны досвед. І тут трэба выбраць свой шлях — альбо ты працуеш у медыя, і тады ты можаш гаварыць ад душы ўсё, што хочаш, у нас няма цэнзуравання медыя, альбо ты палітык павінен абстаноўцы“.
Паводле прызнання Ціханоўскай, у іх з мужам дома было “пару нязначных канфліктаў” на глебе палітыкі: “На фоне “ты навошта гэта сказаў, так няправільна, навошта ты пакрыўдзіў беларусаў?”, і мы вырашылі, што мы не пераносім дадому палітыку, мы дома сям’я, мы дома з дзецьмі”.
Гаворачы аб адмове ад інтэрв’ю CNN падчас візіту ў ЗША 24 верасня пад ціскам мужа дзеля працягу сустрэчы з дыяспарай (эпізод трапіў на анлайн-стрым Ціханоўскага), дэмлідар адзначыла: “Там быў шэраг акалічнасцяў, якія прывялі да гэтага моманту. І, магчыма, дзесьці я была не правы, таму што для Сяргея гэты Стрым быў важны. Я паабяцала прыйсці, і я яго планы разбурыла. І зразумела, што быць у сусветных СМІ — гэта вельмі важна <…> Мы таксама вучымся, і Сяргей відавочна не хацеў, каб гэта выглядала так, як гэта выглядала, ён вельмі моцна перажываў з гэтай нагоды, але мы справіліся“.
Паводле Ціханоўскай, яе муж “не вельмі дыпламатычны чалавек”: “Для дыпламатыі ён відавочна не падыходзіць. Але, магчыма, нам патрэбны такія яркія палітыкі, непрадказальныя <…> Паглядзім, я не хачу звязваць нашу будучыню з Сяргеем толькі з палітыкай, па-рознаму можа скласціся жыццё”.
47-гадовы на дадзены момант відэаблогер Сяргей Ціханоўскі быў у ліку палітвязняў, вызваленых пасля сустрэчы Аляксандра Лукашэнкі і спецпрадстаўніка ЗША па пытаннях Украіны Кітам Келлагам 21 чэрвеня ў Мінску.
Правёў у няволі пяць гадоў і адзін месяц, у апошнія гады ўтрымліваўся ў рэжыме інкамунікада.
