Часам пажар можа стаць следствам гібелі чалавека, а не наадварот — МНС аб памяншэнні постфактум статыстыкі смяротнасці ад агню
19 кастрычніка, Позірк. Памяншэнне колькасці загінулых на пажарах у афіцыйнай ведамаснай статыстыцы пракаментавала ў сваім тэлеграм-канале 19 кастрычніка Міністэрства па надзвычайных сітуацыях.
Каментарый прадстаўлены як адказ на пытанне, якое нібыта паступіла ад падпісчыка: “Актыўна сачу за статыстыкай вашага ведамства на афіцыйным сайце і заўважыў, што часам лічбы статыстыкі загінулых на пажарах людзей зніжаюцца. Як такое магчыма?”
МНС адзначае, што звесткі аб пажарах і ахвярах “рыхтуюцца на падставе сутачных даных аб аператыўнай абстаноўцы ў краіне”.
“Па ўсіх фактах выяўлення на месцы пажару загінулых людзей праводзяцца праверкі, падчас якіх высвятляюцца ўсе абставіны здарэння, у тым ліку прычыны пажару і наступлення смерці”, — гаворыцца ў каментарыі.
Заяўляецца, што для ўстанаўлення прычыны смерці заўсёды праводзіцца судова-медыцынская экспертыза, якая “дазваляе вызначыць характар пашкоджанняў, механізм наступлення смерці (атручэнне прадуктамі гарэння, тэрмічныя апёкі, механічная траўма і інш.), а таксама ўстанавіць наяўнасць або адсутнасць прамой прычыннай сувязі паміж пажарам і смяротным зыходам”.
“Паводле вызначэння, загінулы ад пажару — асоба, якая памерла ад непасрэднага (прамога) уздзеяння на яго небяспечных фактараў пажару. І, як паказвае практыка, часам пажар можа стаць следствам самой гібелі, а не наадварот”, — сцвярджае МНС.
Ведамства прыводзіць прыклад: “Чалавек, закурыўшы цыгарэту, рэзка адчуў сябе дрэнна, што прывяло да спынення сэрца і смяротнага зыходу. Пажар адбыўся ад непатушанай цыгарэты. Паколькі чалавека знаходзяць на месцы пажару, першапачаткова ён патрапіць у зводку МНС як “загінулы на пажары”. У тых выпадках, калі прычынай гібелі не з’яўляюцца небяспечныя фактары пажару і няма прамой прычыннай сувязі з імі, то <…> загінулы будзе зняты з уліку МНС”.
“Варта адзначыць, што высвятленне ўсіх абставінаў пажараў і гібелі людзей займае шмат часу, аж да некалькіх месяцаў, таму ваганні статыстычных даных па пажарах і загінулых абумоўленыя як аператыўнай абстаноўкай, так і ўдакладненнем абставінаў кожнага выпадку. Першасныя звесткі могуць змяняцца ў працэсе праверкі, экспертыз і ўстанаўлення фактаў, што адлюстроўваецца на інфармацыі аб пажарах і загінулых ад іх, размешчанай на інтэрнэт-партале МНС”, — заявілі ў міністэрстве.
“Позірк” неаднаразова звяртаў увагу на тое, што МНС перыядычна карэктуе статыстыку смяротнасці на пажарах у бок змяншэння. У прыватнасці, пра гэта паведамлялася 5 кастрычніка.
