Латушка абмеркаваў вызваленне палітвязняў з новым спецпрадстаўніком Швецыі па супрацоўніцтве з беларускімі дэмсіламі

21 кастрычніка, Позірк. Вызваленне палітычных зняволеных і санкцыі супраць рэжыму Аляксандра Лукашэнкі абмеркаваў намеснік кіраўніцы Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка з новым спецпрадстаўніком МЗС Швецыі па супрацоўніцтве з беларускімі дэмакратычнымі сіламі Патрыкам Свенсанам і кіраўніцай упраўлення Усходняй Еўропы дэпартамента Усходняй Еўропы і Цэнтральнай Азіі знешнепалітычнага ведамства гэтай скандынаўскай краіны Товэ Венергрэн.

Як паведамляе прэс-служба АПК, сустрэча адбылася ў Варшаве, у ёй таксама ўдзельнічаў спікер Каардынацыйнай рады Арцём Брухан.

На сустрэчы Латушка прадставіў інфармацыю аб працы НАУ і АПК у частцы прыцягнення Лукашэнкі да адказнасці “за злачынствы супраць чалавечнасці ў дачыненні да беларускага народа і за ваеннае злачынства — дэпартацыю ўкраінскіх дзяцей з акупаваных тэрыторый Украіны і за акт агрэсіі супраць Украіны”, гаворыцца ў паведамленні.

Намкіраўніцы кабінета звярнуўся да шведскага боку з просьбай “падтрымаць дзейнасць па прыцягненні прадстаўнікоў рэжыму да адказнасці”, а таксама адзначыў “важнасць такой падтрымкі з боку краін — членаў Еўрапейскага саюза”.

У паведамленні адзначаецца, што Свенсан выказаў гатоўнасць працаваць з мэтай далейшай падтрымкі Швецыяй дэмакратычных сіл і “дэмакратычных памкненняў беларусаў”. Асобна ён падкрэсліў, што Стакгольм “заўсёды прымаў і будзе прымаць” захады, накіраваныя на тое, каб “трымаць фокус увагі да беларускага парадку дня на максімальна высокім узроўні ў Еўрапейскім саюзе”.

У лістападзе 2023 года на пасаду спецпрадстаўніка па супрацоўніцтве з беларускімі дэмсіламі была прызначаная Крысціна Юханэсан. Урад Швецыі 31 ліпеня гэтага года прызначыў яе амабасадарам у Маскве.

Свенсан раней працаваў амабасадарам Швецыі ў Арменіі.

15 кастрычніка стала вядома, што часовым павераным у справах Швецыі ў Беларусі і кіраўніком місіі ў амбасадзе ў Мінску прызначаны Ларс-Гунар Вігемарк.

Кіраўнікі дыпламатычных ведамстваў Беларусі і Швецыі былі “адкліканыя для кансультацый” у свае сталіцы ў студзені 2024 года і з таго часу не вярталіся.

Дэмакратычны лідар Святлана Ціханоўская наведвала Швецыю ў чэрвені. Сярод іншага яна сустрэлася з міністрам знешняга гандлю і міжнароднага развіцця Бенджамінам Дауса, міністрам па справах ЕС Есікай Русенкранц, спікерам парламента Андрэасам Норленам і інш.

16 чэрвеня на сустрэчы з членамі групы “За дэмакратычную Беларусь” у шведскім парламенце яна заклікала Рыксдаг падпісаць мемарандум аб супрацоўніцтве з дэмакратычнымі сіламі Беларусі.