У “спіс экстрэмістаў” дададзена 18 чалавек (дапоўнена)

24 кастрычніка, Позірк. У спіс “асоб, якія маюць дачыненне да экстрэмісцкай дзейнасці”, 24 кастрычніка дададзена яшчэ 18 чалавек. Цяпер у апублікаваным на сайце Міністэрства ўнутраных спраў дакуменце 5.916 пазіцый.

У пералік унесеныя Алена Папаламава, Арцём Беразоўскі, Юрый Несцераў, Павел Бабко, Максім Сярэдзіч, Вольга Палачаніна, Мікалай Палачанін, Іван Заяц, Марына Заяц, Віялета Багданава, Раман Кароль, Яўген Мазец, Андрэй Крэйдзіч, Галіна Латугоўская, Анастасія Малчанава, Іван Замяцін, Алег Супрунюк, Алена Цяльпук.

З іх, як пазначана ў дакуменце, пакаранне адбываюць Латугоўская (асуджаная паводле ч. 3 арт. 361¹, ч. 1 і 2 арт. 361⁴, ч. 1 і 2 арт. 367, ч. 1 арт. 368, арт. 369, арт. 369¹ Крымінальнага кодэкса), а таксама палітвязні Крэйдзіч (ч. 1 арт. 368, арт. 369, ч. 3 арт. 361¹, арт. 369¹), Замяцін (ч. 1 арт. 290¹, ч. 3 арт. 361, ч. 3 арт. 361¹, ч. 1 арт. 368), Супрунюк (ч. 3 арт. 361¹).

Насупраць прозвішчаў астатніх дададзеных у спіс стаіць пазнака “судзімасць не пагашаная”.

Багданава і Кароль, згодна з дакументам, вызваленыя ад адказнасці ў сувязі з заканчэннем тэрмінаў прыцягнення паводле арт. 342 КК.

Даведка “Позірку”:

• арт. 290¹ — фінансаванне тэрарыстычнай дзейнасці;
• арт. 342 — арганізацыя і падрыхтоўка дзеянняў, што груба парушаюць грамадскі парадак, або актыўны ўдзел у іх;
• арт. 361 — заклікі да мер абмежавальнага характару (санкцый), іншых дзеянняў, скіраваных на нанясенне шкоды нацыянальнай бяспецы Рэспублікі Беларусь;
• арт. 361¹ — стварэнне экстрэмісцкага фарміравання або ўдзел у ім;
• арт. 361² — фінансаванне экстрэмісцкай дзейнасці;
• арт. 361⁴ — садзейнічанне экстрэмісцкай дзейнасці;
• арт. 367 — паклёп у дачыненні да прэзідэнта, у тым ліку таго, які спыніў выкананне сваіх паўнамоцтваў;
• арт. 368 — абраза прэзідэнта, у тым ліку таго, які спыніў выкананне сваіх паўнамоцтваў;
• арт. 369 — абраза прадстаўніка ўлады;
• арт. 369¹ — дыскрэдытацыя Рэспублікі Беларусь.